Kreu i Kuvendit të Kosovës Kadri Veseli tha se po punonte për një referendum mbi marrëveshjen e Kosovës dhe Serbisë dhe se qytetarët do të vendosnin për të.
Ai e konsideron si të mundshme arritjen e një “marrëveshjeje dypalëshe”, e cila do të ishte e rëndësishme për qasjen e Serbisë në Bashkimin Evropian.
“Ne jemi një vend i pavarur dhe nuk vëmë në diskutim territorin apo sovranitetin tonë”, ka thënë Veseli në një intervistë për të përditshmen e Vjenës – Standart, duke hedhur poshtë ndryshimin e kufijve, si një zgjidhje.
Ai theksoi se nuk ka pjesë jugore dhe veriore, por se Kosova është një “vend perëndimor”.
“Ne ndjekim vetëm atë që është shkruar në Kushtetutën tonë. Ne jemi një demokraci dhe prandaj ne duhet të vendosim çdo gjë me dy të tretat e shumicës në Kuvend”, tha ai.
Sa për tarifat 100 përqind të vendosura nga Kosova mbi importin e mallrave nga Serbia, Veseli tha se është i shqetësuar, porse sipas tij edhe Beogradi ka vepruar ngjashëm më parë.
Në këtë drejtim, ka thënë se, për shembull, Kosova ka investuar 70 milionë euro në sektorin e energjisë, dhe se Serbia e ka bllokuar për vite këtë sektor.
“Dialogu është duke u zhvilluar në mes të dy partnerë të barabartë. Në qoftë se Serbia vendos kushtet në të cilat dialogu duhet të bëhet, kjo do të thotë se Serbia merr seriozisht dialogun”, argumenton ai.
Ai tha se është i lumtur që serbët dhe shqiptarët në Kosovë mund të jetojnë së bashku, brenda kufijve që ata janë sot.
Përndryshe, do të kishte spastrim etnik, dhe kjo do të rrezikonte stabilitetin në Ballkan.
“Ne nuk duam që situata jonë të ketë pasoja negative në vende të tjera në Ballkan”, theksoi ai.
Lidhur me Platformën për Dialogun me Serbinë, ai thotë se Kosova është e gatshme për negociata, por nuk do të lejojë presion ndaj tyre.
Sipas tij, Serbia duhet të ndalojë financimin e strukturave paralele brenda Kosovës dhe kjo duhet të kuptohet më seriozisht nga BE, në mënyrë që çdo gjë të jetë e drejtë. /tesheshi.com/
