Kadri Veseli nuk e ka bërë gabimin e Thaçit i cili vite më parë i quajti malishevasit “zagarë”. Në hapjen e fushatës në këtë qytet, kreu i PDK-së banorët e Malishevës i ka vlerësuar si atdhetarë e intelektualë, por njëkohësisht punëtorë të zellshëm.
“Emri i Malishevës lidhet ngushtë me emrin e lirisë së Kosovës, të UÇK-së”, ka thënë më tej Veseli, ku nga lufta kaloi në bujqësi.
“Bujqësia zë vend të rëndësishëm në platformën e Fillimit të Ri, e cila parasheh mbështetje dhe fuqizim të fermerëve, e rrjedhimisht rritje të prodhimit vendor. Kreu i PDK-së paralajmëroi dyfishim të buxhetit për bujqësinë dhe fermerët, që nënkupton rritje të granteve dhe subvencioneve”, tha Veseli, para malishevasve.
Ndërsa bëri premtimet e njëjta si në çdo komunë tjetër, përmendi rritjen e pagave prej 30 për qind për punëtorët e shërbimit publik dhe rritje prej 25 për qind të pensioneve. /tesheshi.com/
