“Kosovës i duhet një lidership që nuk i gjuan miqtë me gurë”. Kështu është shprehur kreu i PDK-së, Kadri Veseli, gjatë një takimi me struktura dhe qytetarë në qytetin e Podujevës. Ndonëse nuk ka bërë me gisht tek ndonjë parti, ky mesazh i tij thumbues sigurisht i drejtohet Lëvizjes Vetëvendosje, kjo pas një gërvishtjeje që ju bë vite më parë tashmë ish-ambasadores amerikane Tracey Jacobson ndërsa ajo po hynte në Kuvend, ku u përplas paksa me aktivistë të VV-së që po protestonin.
Por Veseli ka harruar të përmendë gjuajtjet me armë që kanë ndodhur nga dritaret e selisë së PDK-së që gjendet në qendër të Prishtinës, çdo herë kur kjo parti ka fituar zgjedhjet, për çka kanë shprehur shqetësimin për këtë edhe ndërkombëtarët, derisa ata që shkrepën armët asnjëherë nuk janë përballur me drejtësinë.
Andaj, vërtetë shtrohet pyetja: çfarë lidershipi i duhet vendit, ata që gjuajnë me gurë apo armë? Sigurisht asnjëra dhe as tjetra, por një lidership, një qeveri të përgjegjshme, të pakorruptuar, që punon për interesat e qytetarëve e jo për interesat e partisë. /tesheshi.com/
