Kryetari i Partisë Demokratike të Kosovës, njëherësh kryetar i Kuvendit, Kadri Veseli, konfirmoi se ka një marrëveshje për për ta votuar demarkacionin në seancën e së mërkurës.
Në një postim në Facebook, ai ka falënderuar partitë e koalicionit, si dhe Lidhjen Demokratike të Kosovës për bashkëpunimin, që sipas tij, duhet të vazhdojë edhe për procese të tjera.
“Sapo kemi arritur konsensusin për të ratifikuar marrëveshjen për shënimin e kufirit me Malin e Zi. Dëshiroj të falënderoj kryeministrin Haradinaj, Lidhjen Demokratike të Kosovës, Nismën Socialdemokrate dhe zëvendëskryeministrin Pacolli, për gatishmërinë për konsensus dhe për dialogun shumë konstruktiv. Ky bashkëpunim duhet të na përcjellë edhe në procese të tjera të rëndësishme për vendin”, ka shkruar Veseli në Facebook.
Demarkacioni me Malin e Zi nuk u votua në dy séance të jashtëzakonshme të Kuvendit, të thirrura për këtë qëllim për shkak të mosarritjes së numrit të duhur të votave për miratimin e tij. /tesheshi.com/
