Mazhoranca në Kosovë dalëngadalë është duke e kupuar se zgjedhjet janë e vetmja zgjidhje për të dale nga kriza aktuale që ka kapluar vendin që nga shtatori i vitit të kaluar.
Edhe pse kryeministri Isa Mustafa disa herë ka përsëritur se zgjedhjet do të mbahen në afatin e paraparë më 2018-të, partia tjetër PDK, konkretisht kreu i Kuvendit Kadri Veseli që së fundmi është zgjedhur edhe ushtrues detyre i kreytarit të këtij subjekti nuk e ka përjashtuar mundësinë e mbajtjes së zgjedhjeve të parakohshme.
Kryekuvendari Veseli pas mbledhjes së Kryesisë së Kuvendit ku u vendos që seanca e radhës të mbahet më 24 mars, ka thënë se do t’i bëhet një ofertë shumë serioze opozitës, për daljen nga ngërçi, por nuk ka treguar se janë pikërisht zgjedhjet apo do t’i ofrojnë ndonjë post të rëndësishëm në qeveri.
Veseli, është pyetur se a mund të shkohet në zgjedhje të reja, nëse opozita nuk pranon as këtë ofertë.
“Me marrëveshje është bërë pavarësia, me marrëveshje janë bërë të gjitha, nënkuptohet edhe zgjedhjet bëhen me marrëveshje”, ka thënë Veseli pas mbledhjes së Kryesisë së Kuvendit ku ka folur para gazetarëve.
Kryeparlamentari ka komentuar djegien e veturave zyrtare kohëve të fundit në vend, me çrast e cilësoi një akt të papranueshëm dhe të dënueshëm, pasi sipas tij, ata që po i bëjnë këto vepra janë kundër pavarësisë dhe shtetit.
/tesheshi.com/
