Kryekuvendari Kadri Veseli dhe i mandatuari për kryeministër Ramush Haradinaj, në një konferencë të përbashkët për mediat, thanë se konsultimi i Listës Serbe me Beogradin është kthyer tashmë në traditë politike, duke mohuar se do t’i nënshtrohen partisë të minoritetit serb.
Haradinaj u shpreh se ka shpresën te Kuvendi i Kosovës si garant i sovranitetit të shtetit.
“E keni parë edhe sot. Nuk është asgjë e lehtë. Jemi të përgatitur për sfidat që na presin. Kemi besim që do të kemi votën e nevojshme për qeveri. Njëkohësisht një qeveri që ka fuqinë e vet.
Kjo është një traditë në politikbërjen dhe vendimmarrjen në Kosovë. Do të jetë vazhdim i situatës që e trashëgojmë. Në Kuvendin e Kosovës janë 120 deputetë. Ata e mbrojnë interesin e shtetit, jo vetëm ata që e kanë pushtetin”, tha Haradinaj..
Ndërkohë, Veseli u shpreh se Kosova nuk do t’i nënshtrohet asnjë liste dhe asnjë qëndrimi politik imponues.
“Ne jemi për një Kosovë perëndimore, që ka një orientim shumë të qartë, që nuk i nënshtrohet asnjë liste e as një qëndrimi politik imponues.
Po flasim për një bashkëpunim politik shumë korrekt mes nesh në të cilin s’ka kurrfarë kushtëzimesh. Edhe kryeministri e tha, është mirë të mos të krijohet problematikë aty ku nuk ka.
Është krijuar një traditë të cilën disa kolegë që sot janë në pozitë e dinë më mirë për të treguar faktorizim. Të gjithë bashkërisht do të punojmë në të mirë të shtetit tonë”, ka pohuar Veseli. /tesheshi.com/
