Kryekuvendari Kadri Veseli, ka zhvilluar një bisedë telefonike me zv.ndihmës sekretarin amerikan të shtetit, Hoyt Brian Yee, me të cilin kanë diskutuar për zhvillimet e fundit politike në vend.
Gjatë bashkëbisedimit, Veseli ka vlerësuar se ekziston një ngecje në vendimmarrje, ndërsa ka rikonfirmuar kërkesën se duhet të ecet përpara në marrjen e vendimeve të rëndësishme për të ardhmen integruese të vendit, bën të ditur një njoftim nga zyra e Veselit.
“Gjatë kësaj bisede telefonike, kryetari Veseli ka diskutuar me diplomatin amerikan për mungesën e vendimeve të rëndësishme të cilat është dashur të merren deri tani në koordinim me miqtë ndërkombëtarë, siç janë ngecjet në reformat ekonomike, ngecjet në riformatimin e qeverisë dhe kryerja e obligimeve ndërkombëtare që ka marrë Kosova si shtet i pavarur e sovran”, thuhet në njoftim.
Veseli ka diskutuar me diplomatin amerikan edhe për kërkesën e qartë të SHBA-ve që qeveria dhe Kuvendi të procedojnë me demarkacionin nesër (e mërkurë) para mocionit të mosbesimit të qeverisë. Veseli e Hoyt Yee janë dakorduar se në rast të mos procedimit të Demarkacionit para mocionit ndaj qeverisë, duhet të lëvizet përpara në rrugëzgjidhje tjera.
“Veseli e ka siguruar zyrtarin e lartë amerikan se Partia Demokratike e Kosovës është në tërësi në mbështetje të qëndrimeve amerikane dhe do të ndërmarrë të gjitha hapat e nevojshëm për ecjen përpara”, thuhet në njoftimin e zyrës së Veselit./tesheshi.com/
