Kryetari i PDK-së, Kadri Veseli është tejet i bindur se menjëherë pas certifikimit të rezultateve të zgjedhjeve, koalicioni PDK-AAK-NISMA do t’i formojë institucionet e reja dhe do zgjedhet Ramush Haradinaj kryeministër.
Edhe pse PAN-i nuk do t’i ketë më shumë se 39 deputetë në Kuvend, gjithnjë sipas rezultateve preliminare të KQZ-së, Veseli nuk tregon se ku do t’i marrin votat për ta votuar qeverinë dhe Kuvendin, kur dihet se LDK me aleatët dhe VV kategorikisht janë kundër hyrjes në koalicion me ta. Për këtë thotë se do të flasin pas 25 qershorit, datë kjo për të cilën beson se edhe do të ketë certifikim nga ana e KQZ-së.
“Unë besoj se shumë shpejt pas 25 qershorit kur pritet që t’i kemi rezultatet do të kemi formimin e institucioneve tona, qeverinë, kuvendin në rend të parë e cila është shumë e qartë që i takon fituesit të koalicionit. Këto kanë qenë rregullat të cilat i kemi pasur, i kemi ditur secili para 11 qershorit në bazë të cilave rregullave jemi sjellë edhe para 11 qershorit, dhe duhet të mendojmë edhe më tepër për interesat e qytetarëve të formohen institucionet , t’i jepen përparësi implementimit të programit të cilat kemi premtuar në mënyrë që mos të kemi bllokada të cilat nuk i nevojiten këtij vendi. Unë besoj shumë që pas 25 qershorit do të flasim edhe për çështjet e numrave. Qeveria në krye me kryeministrin Ramush Haradinaj do të jetë qysh ditët e para e krijuar”, ka thënë Veseli në një intervistë për “Kosova Press”.
Veseli poashtu nuk tregon nëse do të jetë sërish kandidat për kryeparlamentar me arsyetimin se postet nuk janë rëndësi për partië që udhëheq por zhvillimi i vendit. /tesheshi.com/
