Kryeparlamentari Kadri Veseli ka diskutuar me përfaqësuesen e posaçme të BE-së, Nataliya Apostolova për prioritetet e shtetit të Kosovës në fushën e integrimeve evropiane.
Veseli e njohu Apostolovan për rrjedhën e deritashme të punës së institucioneve dhe përkushtimin për agjendën evropiane të Kosovës.
Veseli premtoi se institucionet do t’i zbatojnë të gjitha kriteret e nevojshme për të përmbyllur sa më parë çështjen e lëvizjes së lirë të qytetarëve.
“Kosova është vend evropian dhe institucionet tona janë të përkushtuara në përmbushjen e agjendës së plotë për integrimin e vendit në Bashkimin Evropian. Agjenda e integrimeve evropiane është prioritet kyç i shtetit tonë dhe Kosova shumë shpejt do të përmbushë të gjitha kriteret e nevojshme për lëvizjen e lirë të qytetarëve tanë”, tha kryeparlamentari Veseli.
Ai e siguroi Apostlovan për përkushtimin institucional që marrëveshja e IPA 2016 ku Kosova përfiton 70.5 milionë euro do të miratohet në ditët në vijim me prioritet të veçantë në Kuvendin e Kosovës. Ai, po ashtu, theksoi se të gjitha projektligjet që ndërlidhen me procesin e agjendës për reformë evropiane do të trajtohen me prioritet.
Apostolova, tha se Kuvendi duhet t’i jap prioritet maksimal çështjeve që ndërlidhen me agjendën evropiane.
Ajo përsëriti angazhimin e BE-së ndaj perspektivës evropiane të Kosovës dhe siguroi Veselin se BE-ja do të mbështesë dhe do të vazhdojë të bashkëpunojë ngushtë me të gjitha institucionet dhe partitë politike për të shtyrë përpara reformat dhe agjendën evropiane. /tesheshi.com/
