Kryetari i Kuvendit të Kosovës, Kadri Veseli ka deklaruar se Kryesia e Kuvendit ka marrë vendim që më datën 3 gusht të mbahet tryezë e rrumbullakët, ku do të jetë debat i hapur për demarkacionin.
Debati do të mbahet në sallën alternative, duke filluar në ora 10:00. Kurse, seanca e rregullt është caktuar për datë 4 gushtë nga ora 10:00.
Sipas Veselit, tryeza është e vonuar po aq sa debati në Kuvend.
“Më mirë është vonë se kurrë, aty do të shprehen opinionet dhe mendimet. Jemi duke bërë diçka çka është në interesin e qytetarëve, t’i hapim rrugë një procesi deri tek vendimmarrja. Është interesi jonë te kemi mbrojtjen e territorit të Kosovës”, tha Veseli pas përfundimit të mbledhjes së kryesisë së Kuvendit.
Ai theksoi se qytetarët duhet të jenë të sigurt, pasi vendimmarrja do të jetë në interes të shtetit dhe qytetarëve tanë.
“S’kemi nevojë për t’u vonuar por as për t’u ngutur për të bërë hapa që na kthejnë mbrapa”, tha ai.
Veseli tha se procedimi në Kuvend do të jetë transparent dhe asgjë nuk do të jetë befasi, pasi do të mbahet mbledhja e kryesisë, ku Demarkacioni do të jetë në rend dite.
Edhe nënkryetarja e Kuvendit nga radhët e Lëvizjes Vetëvendosje, Aida Dërguti ka njoftuar se kryesia e Kuvendit të Kosovës ka vendosur që me datë 3 gusht të mbahet debati profesional-shkencor mes komisionit shtetëror për Demarkacion dhe grupit të njohësve profesionist për diskutim dhe ballafaqim faktesh për çështjen e Demarkacionit Kosovë-Mali i Zi.
Sipas saj, më 4 gusht do të ketë seancë të rregullt në Kuvendin e Kosovës.
“Të shohim ballafaqimin e qëndrimeve të ndryshme, të ndikojë në formësimin e qëndrimeve të deputetëve që nuk janë deklaruar ende, a janë pro a kundër. Besoj që marrëveshja për demarkacionin tashmë është e pavlefshme dhe debati do të ndikojë tek deputetët që ende nuk janë deklaruar pro apo kundër demarkacionit”.
Debati për demarkacionin do të mbahet në sallën alternative të Kuvendit të Kosovës.
/tesheshi.com/
