Nga Blendi Gashi
Vizita 24-orëshe e e kryeparlamentarit të Shqipërisë, Ilir Meta dhe takimi i tij me krerët opozitarë, homologun e tij Kadri Veseli dhe presidenten Atifete Jahjaga, shihet si një mundësi e mirë që “gjakrat” mes pozitës dhe opozitës kosovare të ulen dhe të fillojw dialogu mes tyre.
Njohësit e rrethanave politike në vend thonë se përvoja e Metës mund të ndihmojë në tejkalimin e krizës politike, pasi ka miqësi të mirë me liderët kosovarë.
Ata thonë se Meta e dha kontributin e tij, kurse tani ngelet tek klasa politike në Kosovë të gjejnë alternativën se si të zgjidhin problemet.
Profesor Dashamir Bërxuli, ka deklaruar për tesheshi.com se se përvoja politike e kryekuvendarit Meta dhe kontaktet e vazhdueshme me të gjithë liderët kosovarë do të ndihmojnë në tejkalimin e përçarjes pozitë dhe opozitë.
Sipas tij, vet fakti se të gjithë ju përgjigjën ftesës së Metës, është shenjë se kriza mund të kalohet.
“Ka të bëjë me sanimin e raporteve personale midis akterëve kryesorë në Kosovë që shihen si pengesë për kalimin e krizës politike. Mbetet të shohim se cilat do të jenë ofertat dhe rrugët që do të zgjidhen pasi nuk mendoj se Meta ka ardhur pa një dakrodim të palëve”, thotë Bërxuli.
Analisti, Florim Zeqa, e quan të mirëseardhur çdo iniciativë i liderëve politikë shqiptarë, e që është në funksion të ndihmës për tejkalimit të krizës politike kosovare.
Ai e vlerëson lartë ndërhyrjen e Metës për zgjidhjen e situatës së rëndë e po aq të komplikuar politike.
“Përvoja politike e zotit Ilir Meta duhet të reflektojë në radhë të parë tek pozita, tek krerët e qeverisë dhe kryeparlamentari në zbutjen e qendrimeve skajshmërisht të ngurta në raport me kërkesat e opozitës, që në fakt janë kërkesa të shumicës shqiptare në vend. Raportet e mira të zotit Meta me krerët e opozitës dhe konstruktiviteti me krerët e lartë shtetërorë (pozitën), lenë për të shpresuar për fillimin e zgjidhjes së kompromisit politik për tejkalimin e bllokadës tremujore parlamentare dhe zgjidhjen përfundimtare të kontekstit politik pozitë-opozitë në Kosovë. Me arritjen e një marrëveshje të mundshme politike, para opinionit ndërkombëtar, përpos pjekurisë politike do të dëshmonim edhe nivel të lartë të kapaciteteve shtetndërtuese”, ka deklaruar Zeqa, për tesheshi.com.
Politologu Albinot Maloku, thotë se Republika e Shqipërisë si shtet dhe si politikë shtetërore e ka obligim kushtetues të kujdeset për shqiptarët jashtë Shqipërisë edhe të rekomandojë, ndihmojë dhe fuqizojë zhvillimet e gjithëmbarshme të shtetit të Kosovës.
Maloku, në një prononcim për tesheshi.com thotë se takimet e Metës me drejtuesit e subjekteve politike dhe organeve shtetërore të Kosovës, sidomos tani pas krizës politike e institucionale në vend i sheh në frymën e vullnetit të mirë.
“Meta e dha kontributin, kurse tani ngelet tek klasa politike në Kosovë të gjejnë alternativën më të mirë për zgjidhjen e problemeve e krizave politike në vend. Takimet e kryekuvendarit Meta me politikbërësit në Prishtinë nuk dua t’i shoh në nivelin e miqësove e jaranive, por të interesit të tij prej burrështetasi në lidhje me krizën politike në një vend vëlla, pra në Kosovë. Impakti i tij nuk mund të jetë i madh, por është për t’u lavdëruar iniciativa për të kontribuar në kalimin e kësaj krize politik”, ka deklaruar Maloku.
Kryparlamentari i Shqipërisë, pas një vizite që realizoi në Prishtinë tha se ka arritur t’i bindë liderët e partive opozitare që të ulen në tryezë dhe të dialogojnë me përfaqësuesit e Kuvendit dhe të qeverisë për gjetjen e një zgjidhjeje për dalje nga kriza politike. /tesheshi.com/
