Ndër lajmet e fundit mbi etapat inauguruese të presidentit të 45-të të Shteteve të Bashkuara, Donald Trump, ishte dhe ai i këndimit të Kur’anit nga një imam i njohur në Amerikë, i cili përmes tyre i përcolli kreut të ri të Shtëpisë së Bardhë dy versete që përmbanin mesazhe kundrejt frymës që përfaqson Trump, sidomos në lidhje me emigrantët në përgjithësi dhe muslimanët në veçanti, së cilës të gjithë i tremben.
Për shumë njerëz, të cilët ndoshta e gjykojnë Kur’anin vetëm si një libër mistik, këndimi i tij para Trump ka patur efekt po ashtu mistik; ndërkohë që gjithçka i është kumtuar prej atij që muslimanët e konsiderojnë Fjalë të Zotit për jetën, njerëzit, besimin, ka qenë tejet real dhe i lidhur me të përditshmen e botës.
Siç është bërë me dije, versetet kanë qenë:
“O ju njerëz, vërtetë Ne ju krijuam ju prej një mashkulli dhe një femre, ju bëmë popuj e fise që të njiheni ndërmjet vete, e s’ka dyshim se te All-llahu më i ndershmi ndër ju është ai që më tepër është ruajtur (këqijat) e All-llahu është i dijshëm dhe hollësisht i njohur për çdo gjë” (Surja Huxhurat: 13)
“Nga argumentet e Tij është krijim i qiejve e i tokës, ndryshimi i gjuhëve tuaja dhe i ngjyrave tuaja. Edhe në këtë ka argumente për njerëz”. (Surja Rrum, Ajeti 22)
Pra, në to përcillet se Zoti i krijoi njerëzit nga një origjinë dhe lloj i vetëm, prej Ademit dhe Havasë, por nga ana tjetër ata ndryshojnë në formë, pra në fise e kombe. Pikërisht këtu fshihet edhe urtësia ku Zoti revelon se këtë gjë e bëri me qëllim që njerëzit të krijojnë ura komunikimi midis kulturave dhe kombeve, pasi përndryshe ata do degradonin në luftëra etnike, racore, klanore, etj.
Dhe sikur vetëm me këtyre dy verseteve t’u ishte drejtuar Hitleri, Millosheviçi, udhëheqës të ngjashëm me ta në zullume, kudo e në çdo kohë botës do t’i ishte kursyer shumë gjakderdhje dhe shumë tragjedi njerëzore nuk do kishin ndodhur.
Nga ana tjetër duhet theksuar se këto versete janë përcjellë nga Profeti Muhamed në një kohë që ai e kishte themeluar shtetin e tij në Medine dhe pasi kishte lejuar që minoritetet e tjera fetare të gjykonin me kushtetutat e tyre përkatëse (Biblën dhe Torën).
Dhe ky është një dimension i paimagjinuar në demokracitë e sotme bashkëkohore, ku nuk mund të hamendësohet që në një vend ku sundojnë ligjet laike, përgjithësisht në Perëndimor, muslimanët të lejohen të gjykojnë me Kur`an. E kundërta pra ka ndodhur me shtetin e Muhamedit qindra vite më parë.
Përgatiti: Enklid Pelari – /tesheshi.com/
