Veriu i trazuar, kryediplomati amerikan kërkon ndëshkim

Sekretari amerikan i Shtetit, Antony Blinken ka zhvilluar një bisedë telefonike me kryeministrin e Kosovës, Albin Kurti dhe presidentin serb, Aleksandar Vuçiç.

Ata diskutuan për dialogun e udhëhequr nga Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, për deeskalimin dhe normalizimin e marrëdhënieve ndërmjet Serbisë dhe Kosovës.

Në këtë kontekst, Kurti e ka njoftuar Blinken për takimin dypalësh të enjten e kaluar në Bruksel “kur takimi trepalësh nuk u zhvillua për shkak të mosgatishmërisë së Presidentit të Serbisë”.

 Mbështetje e vazhdueshme

Kurti dhe Blinken diskutuan, siç thuhet në njoftim, “për situatën në katër komuna në veri të Kosovës, për zgjedhjet e reja që duhet t’i paraprijnë sundimi i ligjit, për ekstremistët e dhunshëm që sulmuan ushtarët e KFOR-it, policinë e Kosovës dhe gazetarët, dhe rreth tre nënkryetarë serbë në komunat Leposaviq, Zveçan dhe Sjeverna Mitrovicë”.

Është folur edhe për konfiskimin e armëve dhe shumë municioneve në një veturë me targa të Beogradit, si dhe për nevojën e zbatimit të plotë, konsistent dhe të pakushtëzuar të Marrëveshjes Themelore të Brukselit.

Kurti e falënderoi Blinken për mbështetjen e vazhdueshme dhe gjithëpërfshirëse të SHBA-së, dhe e njoftoi me të arriturat e Kosovës në fushën e ekonomisë, demokracisë dhe sundimit të ligjit.

Të dy ranë dakord që të qëndrojnë në komunikim të rregullt dhe të shpeshtë me qëllim të paqes dhe sigurisë në Kosovë dhe me qëllim të normalizimit të marrëdhënieve me Serbinë, thuhet në komunikatën pas bisedës.

Uashingtoni me planin e BE-së

Ndërsa në bisedën me Vuçiç, thuhet se Blinken përshëndeti lajmin për lirimin e tre pjesëtarëve të policisë së Kosovës, raporton Tanjug.

Sipas Departamentit të Shtetit, ai bëri thirrje për uljen e tensioneve mes dy palëve.

Blinken përsëriti gjithashtu se ata që janë përgjegjës për sulmet e fundit ndaj anëtarëve të KFOR-it në veri të Kosovës duhet të mbajnë përgjegjësi dhe theksoi mbështetjen e vazhdueshme të Uashingtonit për planin trepikësh të Bashkimit Evropian.

Sekretari amerikan i Shtetit i bëri thirrje Beogradit që menjëherë të ndërmarrë hapa për të zbatuar detyrimet e tij nga marrëveshja për normalizimin e marrëdhënieve me Kosovën, thuhet në deklaratë. /tesheshi.com/