Nga Musa Mustafa
Problemet për shqiptarët që kanë pronat në veri të Mitrovicës nuk kanë të sosur, ndërsa qeveria e Kosovës ka mbyll një sy (ose që të dy) karshi këtyre problemeve. Asaj po i dhemb më tepër Asocacioni.
Reshat Presheva, banor i lagjes “Kodra e Minatorëve”, në veri të Mitrovicës, tash e 16 vite jeton me qira në pjesën jugore Mitrovicës, aty ku mundet ta gjejë një kulm mbi kokë sa më të lirë.
Sepse në anën tjetër, shtëpinë e tij dykatëshe në veri të Mitrovicës e kanë uzurpuar tri familje serbe që jetojnë në të që pas përfundimit të luftës në Kosovë.
“Tash e 16 vite po jetoj me qira nëpër shtëpi dhe bodrume në pjesën jugore të Mitrovicës, ndërsa shtëpinë që e kam ndërtuar të re pak para lufte janë duke ma shfrytëzuar tri familje serbe që janë vendosura dhunshëm në të”, ka thënë Reshat Presheva për portalin tesheshi.com.
“Shtëpinë e kam të ndërtuar në pronën time prej 3 ari në lagjen ‘Kodra e Minatorëve’, por fatkeqësia më e madhe është se tani në oborrin e shtëpisë sime, serbi që banon aty Ivan Palloviq, ka filluar të ndërtojnë një objekt të ri, pa lejen time”, ka thënë Presheva.
“Nuk e di realisht se çfarë është duke ndërtuar shtëpi apo garazh, por dihet se po ndërton sikurse ajo të ishte prona e tij”, ka shtua Presheva bukur i shqetësuar.
Ai ka shtuar se shtëpinë dykatëshe që e ka ndërtuar para lufte, është në një truall pronë e tij, e që për ta vërtetuar këtë posedon të gjitha dokumentet.
Presheva ka shtuar se rastin e ka paraqitur në policinë e Kosovës në veri si dhe iu është drejtuar edhe Gjykatës Themelore të Mitrovicës me seli në Vushtrri.
“Policia më ka thënë se i ka ndërprerë punimet e serbit që është duke ndërtuar, por me ka udhëzuar që t’i drejtohem edhe gjykatës në mënyrë që unë t’i realizojë të drejta e mia pronësore si dhe të dëbojë banorët ilegalë nga prona dhe shtëpia e ime”, ka thënë Presheva.
Por sipas tij, edhe serbi që është duke banuar aty ilegalisht ka paraqitur disa dokumente se gjoja prona ku po ndërton është e tij.
“Nuk e di se çka është duke u bërë me ne shqiptarë e pjesën veriore të Mitrovicës të cilët po trajtohem sikurse të kishim qenë jetimet e Kosovës, ne nuk kemi kurrfarë të drejtash në jug ndërsa që në veri serbët nuk po na lejojë që të kthehemi në shtëpitë tona”, ka thënë i dëshpëruar Presheva.
Ai ka apeluar tek institucionet qendrore të Kosovës në Prishtinë që të kthejnë kokën nga Mitrovica nga pjesa veriore dhe t’u mundësojnë që të shkojmë në shtëpitë e tyre për të jetuar, e jo të lënë në duar të strukturave paralele të Serbisë.
Në anën tjetër zëvendësdrejtori i policisë së Kosovës prë veri Besim Hoti, ka theksuar se policia është njoftuar me ndërtimin që është duke u bërë në pronë e Reshat Preshevës në lagjen ‘Kodra e Minatorëve”.
Hoti ka thënë se policia, pas ankesës së pronarit ka dalë në vendin e ngjarjes dhe ka ndërprerë punimet deri në një vendim të ri të Gjykatës pasi që edhe serbi ka paraqitur disa dokument se gjoja është pronar i kësaj shtëpie. /tesheshi.com/
