Hasan Ruhani gjendet prej ditës së djeshme në Francë, pas një qëndrimi në Itali. Rivendosja e marrëdhënieve ekonomike dhe arritja e marrëveshjeve tregtare janë në qendër të vizitave të presidentit iranian menjëherë pas heqjes së sanksioneve ndërkombëtare.
Ruhani ka deklaruar me të arritur në Francë se vizita e tij ishte një hap i rëndësishëm për thellimin e marrëdhënieve mes Iranit dhe Francës. Mes marrëveshjeve tregtare, më e pritshmja është ajo për blerjen nga Irani të mbi 100 avionëve të rinj Airbus.
Ndërkaq, mes kësaj atmosfere, është anuluar një drekë midis presidentit Hollande dhe homologut të tij iranian, Ruhanit. Shkak për këtë është bërë refuzimi i francezëve për të hequr nga menyja verën. Ndërsa iranianët kanë kërkuar një meny hallall, francezët kanë këmbëngulur në ofrimin e ushqimeve lokale dhe të verës, duke u justifikuar me arsyetimin se gjithçka tjetër do të ishte kundër vlerave republikane.
Në vend të kësaj, nga autoritetet franceze është sugjeruar ngrënia e përbashkët e një mëngjesi, e refuzuar nga iranianët si “shumë e lirë”.
Ndryshe francezëve, italianët u treguan më elastikë gjatë vizitës së Ruhanit, duke mos i bërë pijet alkoolike pjesë të menyve të darkava shtetërore, e duke i mbuluar statujat nudo brenda institucioneve. /tesheshi.com/
