Qeveria polake vijoi “talljen” me Komisionin Europian pasi ky i fundit ndërmorri veprime ligjore kundër reformës së Gjyqësorit në Varshavë.
Vala e re e armiqësisë erdhi pasi Komisioni e vuri në dijeni Poloninë përmes një letre formale të shtunën se ka depozituar “procedurat për shkelje”, në lidhje me një ligj për moshën e pensionimit të gjyqtarëve.
Komisioni thotë se janë përdorur “kritere të vagullta” sesi ministri polak i Drejtësisë, Zbignieë Ziobro, do të vendosë për zgjatjen e mandateve të gjyqtarëve, gjë që i lejon atij të ushtrojë ndikim mbi ata.
Komisioni po ashtu e akuzon Poloninë për diskriminim gjinor pasi gratë nxirren në pension në moshën 60 vjeç ndërsa gjyqtarët burra 65 vjeç.
Komisioni i ka dhënë Varshavës një muaj kohë për të adresuar këto shqetësime, ose të përballet me veprime ligjore deri në gjoba.
Zëvendës-komisioneri europian Frans Timmermans me anë të një deklarate publike apeloi ministrin Ziobro të shkojë në Bruksel sapo të paraqitet mundësia për hir të dialogut konstruktiv. Por, reagimi i parë i Ziobro tregon se ky takim mund të mos shkojë mirë.
“Eshtë qartësisht betejë politike me Poloninë. Ka grupe dhe politikanë me ndikim pas gjithë kësaj, interesat e të cilëve janë për një Poloni të dobët dhe të hapur ndaj ndikimeve nga jashtë”, tha ai për “Nasz Dziennik”, një gazetë polake e krahut të djathtë. /tesheshi.com/
