Tani dhemb shumë për Shqipërinë ai rast i humbur nga Gashi në takimin ndaj Zvicrës, siç dhemb dorëzimi në minutat e fundit ndaj Francës. Me një pikë më shumë, sot gjërat do të ishin krejt ndryshe për përfaqësuesen shqiptare.
Pas katër takimeve të së martës, mundësitë që Shqipëria të kalojë në turin tjetër të Euro 2016-tës janë thuajse minimale. E kjo sepse takimet e së martës nuk kanë përmbushur asnjë prej pritshmërive të kuqezinjve.
Pritej që në grupin C Gjermania ta fundoste mirë Irlandën e Veriut. Por nuk ka ndodhur kështu. Vetëm një fitore minimale, 1-0, për gjermanët, me golin e shënuar nga Mario Gomez në minutën e 29-të. Çka bën që Irlanda e Veriut të përfundojë e treta në grup, por me golavarazh 0, që është më i mirë se ai i Shqipërisë. Polonia fitoi 1-0 ndaj Ukrainës, por kjo ndeshje nuk hynte te llogaritë e holla të shqiptarëve.
Zhgënjimi ka pasuar në mbrëmje, kur Turqia, që gjer tani kishte patur një prej paraqitjeve të veta më të dobëta, është kujtuar të fitojë 2-0 ndaj Çekisë. Rezultat që i ngjit turqit në vend të tretë në grupin D, duke shpresuar shumë në një kualifikim surprizë, edhe për shkak të një golavarazhi më të mirë se të Shqipërisë. Po në këtë grup, Kroacia ka mundur Spanjën 2-1, në një prej befasive më të mëdha të këtij Europiani.
Çfarë i mbetet Shqipërisë? Të presë dhe katër takimet e kësaj të mërkure në dy grupet e fundit, E dhe F. Veçse është shumë e vështirë që të ketë një kombinim të tillë rezultatesh që ta kualifikojnë Shqipërinë.
Sepse, më së pari Hungaria duhet të fitojë ndaj Portugalisë! Shumë e vështirë, gati e pamundur. Gjithsesi, futbolli ofron në çdo çast të papritura. Kjo ndeshje luhet në orën 18:00. Pas mbarimit të saj, lojtarëve të Shqipërisë o do t’u duhet të mbledhin plaçkat, o duhet të presin dhe dy takimet e orës 21:00.
Veçse Hungaria duhet të fitojë! Të shpresojmë, përndryshe na duhet të pranojmë realitetin. /tesheshi.com/
