Venezuelasit pritet të dalin në rrugë pas thirrjeve të liderit të opozitës Juan Guaido. Ai u zotua se sot do të mbanin “marshimin më të madh” në historinë e vendit. Thirrja vjen vetëm një ditë pasi Guaido kërkoi që ushtria të rrëzojë presidentin Nikolas Maduro.
Me një përpjekje të guximshme për të fituar mbështetjen e ushtrisë, Guaido u shfaq të martën në mëngjes jashtë një baze të forcave ajrore në Karakas me dhjetra anëtarë të Gardës Kombëtare.
Kjo shkaktoi një ditë me protesta të dhunshme, duke lënë më shumë se 100 të plagosur, por pa asnjë shenjë konkrete të dëbimit të Maduros nga ana e ushtrisë.
“Ne e dimë se Maduro nuk ka mbështetjen apo respektin e forcave të armatosura,” tha Guaido në një video-mesazh të postuar në media sociale. “Ne kemi parë se protesta jep rezultate, prandaj duhet të vazhdojmë presionin”.
Ndërsa Guaido fitoi simpatinë e Shteteve të Bashkuara dhe shumicës së vendeve perëndimore, forcat e armatosura kanë qëndruar pranë Maduros, i cili ka mbështetjen e aleatëve si Rusia, Kina dhe Kuba.
Standardet e jetesës venezueliane kanë rënë edhe më shumë në muajt e parë të vitit, me një seri ndërprerjesh të rrymës dhe mungesë të ujit të pijes. Problemet kanë shtuar hiperinflacionin dhe mungesën kronike të ushqimit dhe ilaçeve, gjë që ka nxitur miliona persona drejt emigrimit. /tesheshi.com/
