Venezuela ka propozuar Turqinë si “fuqi mbrojtëse” për ambasadën e saj në Uashington – tha të mërkurën ambasadori i saj në OKB.
“Shtetet e Bashkuara po e emërojnë qeverinë zvicerane si fuqi mbrojtëse në Karakas, dhe ne po e respektojmë këtë vendim. Por ne gjithashtu kemi nevojë që ata të pranojnë fuqinë tonë mbrojtëse”, tha Samuel Moncada gjatë një konference shtypi.
“Ne jemi duke propozuar Turqinë, për shembull. Por ata u përgjigjën ‘Jo’. Ne nuk njohim kërkesat tuaja, por vetëm të kreut të opozitës Juan Guaido”, shtoi ai.
Sipas Konventës së Vjenës mbi Marrëdhëniet Diplomatike, nëse raportet midis dy vendeve prishen, të dy palët mund të zgjedhin një vend të tretë të pranueshëm për shtetin që ka nevojë për fuqi mbrojtëse në ambasadën e shtetit me të cilin ka tensione.
Venezuela është tronditur nga protestat që nga 10 janari, kur presidenti Nikolas Maduro u betua për mandatin e dytë pas një votimi të bojkotuar nga opozita.
Tensionet u përshkallëzuan kur Juan Guaido, i cili kryeson Asamblenë Kombëtare të Venezuelës, e deklaroi veten si president në detyrë më 23 janar, një veprim i cili u mbështet nga Shtetet e Bashkuara dhe shumë vende të Evropës dhe Amerikës Latine.
Turqia, Rusia, Kina, Irani, Bolivia dhe Meksika megjithatë vazhdojnë të mbështesin Maduron. /tesheshi.com/
