Një opinion i përcjellë së fundi nga Venecia lidhur me ngerçin në Kushtetuese, atë të ardhur nga mospranimi prej Metës i Arta Vorpsit dhe emërimi i Marsida Xhaferallarit, është përjetuar nga kreu i shtetit si fitore e tij, pasi është përkthyer si akt i duhur kushtetues
Venecia thotë se “Presidenti, përmes Aktit të tij të 5 nëntorit 2019, pezulloi në mënyrë të njëanshme procedurën e emërimit para skadimit të afatit 30 ditor të përcaktuar në ligj. Ndërsa një pezullim i tillë nuk parashikohet në mënyrë eksplicite nga Ligji për Gjykatën Kushtetuese, ai mund të jetë në përputhje me një mekanizëm zhbllokues që ka për qëllim zhbllokimin e një situate kur ka mosveprim ose vullnet dashakeq nga njëri prej aktorëve të përfshirë.
Nëse nuk ka as vullnet dashakeq dhe as mosveprim, por përkundrazi duhet të plotësohet një boshllëk ligjor, ratio legis i mekanizmit zhbllokues nuk do të ishte i zbatueshëm. Si pasojë, do të duhet të ekzistojë mundësia për të ndërprerë funksionimin – përndryshe automatik – të mekanizmit zhbllokues.
Ndaj, në bazë të një interpretimi teleologjik të dispozitave ligjore, është e justifikueshme të pranohet emërimi i mëvonshëm i një kandidati të dytë nga Presidenti.
Prandaj duket e arsyeshme që Presidenti refuzoi të pranonte betimin e gjyqtares që pretendon se u emërua automatikisht”.
Pas kësaj, nga Presidenca doli ky reagim: “Kauza e 2 marsit fitoi. Kushtetuta e para!”
Kaq lumturisht e përjetoi dhe opozita këtë zhvillim.
“Komisioni i Venecias konfirmoi qartë se ka zero shkelje të Kushtetutës nga Presidenti i Republikës në betejën legjitime kundër kapjes së Gjykatës Kushtetuese”, shkroi nr.2 i PD-së, Gazmend Bardhi. /tesheshi.com/
