Autoritetet e Venecias planifikojnë të kufizojnë numrin e njerëzve në grupe turistike në një maksimum prej 25 nga e enjtja, në përpjekjen e fundit për të reduktuar ndikimin e turmave në mënyrën e jetesës së qytetit lagunor.
Autoritetet lokale do të ndalojnë gjithashtu përdorimin e altoparlantëve portativë nga guidat turistike për të “garantuar paqen e banorëve të qytetit” dhe për të lejuar lëvizjen më të lirë të këmbësorëve.
Gjoba që variojnë nga 25 deri në 500 euro do të vendosen për të gjithë ata që nuk respektojnë masat e reja, të cilat fillimisht duhej të hynin në fuqi në fillim të qershorit, por u shtynë për fillimi i gushtit.
Kufizimet e fundit do të zbatohen për qendrën e Venecias dhe ishujt Murano, Burano dhe Torcello.
Në prill, Venecia u bë qyteti i parë në botë që prezantoi një sistem të posaçëm pagese për të hyrë në qendër të qytetit për vizitorët e jashtëm, si pjesë e një eksperimenti që synon të pengojë udhëtarët ditorë që të vijnë atje në oraret e pikut.
Programi pilot, zbatimi i të cilit monitorohet me kujdes nga destinacione të tjera turistike evropiane, zgjati vetëm 29 ditë.
Ai përfundoi në korrik, por i hapi rrugën një periudhe konsultimesh pas së cilës do të vendoset se si do të vazhdojë ky projekt në të ardhmen.
Duhet theksuar se në rastin e grupeve turistike ka përjashtime të shumta nga rregullat. Për shembull: fëmijët nën dy vjeç nuk llogariten dhe kufizimet nuk zbatohen për nxënësit dhe studentët që mbërrijnë në Venecia për një vizitë arsimore ose janë në një udhëtim studimor, thekson Reuters.
