Inagurimi i presidentit Donald Trump po hedh dyshime për vendosjen më të madhe të trupave amerikane në Europë që nga fundi i Luftës së Ftohtë. Trupat e Shteteve të Bashkuara nisën të mbërrijnë në Poloni këtë javë si pjesë e një strategjie të dakordësuar verën e vitit të kaluar gjatë një samiti të NATO-s në një përpjekje për të dhënë siguri për shtetet lindore të Europës që ndjehen nervoze për aktivitetin e shtuar të Rusisë, në kufi me to.
Rreth 1 mijë nga 4 mijë trupat e premtuara arritën në Poloni në fillim të javës, njoftuan autoritetet. Mbërritja e tyre do të shënohet edhe formalisht në një ceremoni mirëseardhjeje të shtunën.
Kremlini e ka bërë të qartë se kjo lëvizje e ka shqetësuar, duke thënë se përfaqëson një kërcënim për sigurinë e tij kombëtare. Zëdhënësi i Vladimir Putin, Dmitry Peskov, tha se Rusia e shikon lëvizjen si një hap agresiv drejt kufijve të saj.
“Ne e përceptojmë si një kërcënim”, tha ai. “Këto veprime kërcënojnë interesat tona, sigurinë tonë. Sidomos përsa i takon ndërtimit të pranisë ushtarake nga një palë e tretë në afërsi të kufijve tanë. Nuk është as shtet europian”.
Vendosja e trupave ishte planifikuar fillimisht për në ditët e fundit të janarit, mirëpo vendimi u mor muajin e kaluar për ta përshpejtuar atë, me gjasa ka të bëjë me një lëvizje të Barak Obamës përpara se ai të largohet nga detyra. Synimi duket se ka të bëjë me faktin e kryer të angazhimit në këtë strategji të presidentit të zgjedhur, Donald Trump.
Ndërsa marrëdhëniet midis Shteteve të Bashkuara dhe Putinit janë përkeqësuar që nga aneksimi i Krimesë prej Ukrainës në vitin 2014, Trump ka sinjalizuar vullnetin për të punuar me presidentin rus dhe thotë se nuk është e domosdoshme t’u përmbahet angazhimeve të marra në kuadër të NATO-s për të mbrojtur gjithë anëtarët e saj, në rast sulmi.
Gjatë një konference shtypi të mërkurën, Trump shtoi edhe më shumë në këtë panoramë, duke thënë se nuk ishte e thënë se ai do ishte në gjendje të punonte me Putinin.
Përveç trupave amerikane, me qindra mjete të blinduara dhe tanke kanë rrugëtuar me aeroplanë nga Shtetet e Bashkuara drejt Gjermanisë ku do të kalojnë tranzit me rrugë hekurudhore deri në Poloni dhe gjetkë në vendet e Europës Lindore. Shtetet e Bashkuara po dërgojnë 87 tanke dhe 144 mjete të blinduara, bashkë me trupat.
Komandanti i trupave tokësore amerikane në Europë, lejtnant gjenerali Ben Hodges, tha në dhjetor kur njoftoi përshpejtimin e vendosjes së trupave se ato do të mbërrinin në portin gjerman, Bremerhaven më 6 janar dhe do të niseshin menjëherë drejt Polonisë, shteteve Balltike dhe Rumanisë.
“Kam besim në këtë sinjal shumë të fuqishëm, se mesazhi do të dërgohet se Shtetet e Bashkuara, së bashku me pjesën tjetër të NATO-s, janë të angazhuara në mbrojtje”, tha Hodges.
Edhe Britania e Madhe kontribuon në shtimin e trupave të NATO-s në lindje të Europës, pasi formalisht mori edhe komandën e forcave të kundër-përgjigjes. 3 mijë trupa britanike plus të tjera nga NATO do të jenë gati të vendosen në lindje brenda pak ditësh. Vendet kontributore përfshijnë SHBA, Danimarkën, Spanjën, Norvegjinë dhe Poloninë.
Përgatiti: Juli Prifti – /tesheshi.com/
