Një sasi e konsiderueshme e eksplozivit u gjet në xhaminë e Drenasit, një gjë kjo e pazakontë për hapësirat shqiptare.
Me të lajmëruar rastin në polici, njësiti për deminim ka dalë në vendin e ngjarjes dhe ka deminuar sasinë prej 1.5 kg eksploziv.
Imami Osman Musliu, i cili shërben në këtë institucion fetar, tha për Klan Kosova se në momentin kur u gjet lënda shpërthyese në xhami kishte edhe fëmijë.
Ai është shprehur i tmerruar me situatën e krijuar kur u mor vesh se në oborrin e xhamisë kishte eksploziv, ndërsa shtoi se kjo vepër ka ardhur nga njerëz profesionistë në të tilla gjëra.
“Zoti na shpëtoi nga ky tmerr, se patëm të vdesim të gjithë. Ata që kanë vendosur eksplozivin në xhami duket se kanë qenë profesionistë të njëmendët”, tha Musliu.
Kreu i AAK-së, Ramush Haradinaj ka qenë politikani i parë që ka reaguar duke thënë se vendosja e eksplozivit në xhami tejkalon sjelljen njerëzore, ideologjinë dhe besimin.
Haradinaj tha se rasti i raportuar në Drenas duhet të hetohet deri në detaje, të zbardhen motivet dhe të dënohen rëndë autorët.
“Është fatmirësi prej Zotit që njerëzit kanë shpëtuar nga ky tentim për tragjedi. Imami Musliu, besimtarët praktikues në atë xhami dhe të gjithë njerëzit në Kosovë, duhet të kenë besim dhe përkushtim që së bashku mos të lëmë shfaqjen dhe as triumfin e të keqes.
Aleanca dhe unë jemi të vendosur për forcimin e shtetit, zhvillimin e gjithmbarshëm, garantimin e sigurisë, dhe jetën më të mirë për të gjithë.
Nuk do ta lejojmë të keqen në Kosovë”, ka thënë Haradinaj përmes një reagimi bërë në Facebook.
/tesheshi.com/
