Protestat për papunësinë në Tunizi, të dala jashtë kontrollit dhe të kthyera në të dhunshme, i kanë detyruar autoritetet e vendit të vendosin ndalimqarkullimin në tërë territorin.
Ndërsa një natë më herët u sulmuan stacionet policore dhe pati një sërë aktesh vandale, Ministria e Brendshme e ka justifikuar vendosjen e ndalimqarkullimit me rrezikun që paraqesin për vendin dhe qytetarët tunizianë sulmet mbi pronën publike dhe private.
Ndalimqarkullimi ka nisur mbrëmë prej orës 20:00, ndërsa kryeministri Habib Essid ndërpreu një vizitë në Francë, dhe ka deklaruar tashmë se gjendja është nën kontroll.
Protestat nisën më 19 janar në Kasrin, për t’u hapur më pas në shumë qytete të tjera. Papunësia në Tunizi është rreth 15 për qind, por është dyfishi, 30 për qind, te të rinjtë.
Këto janë protestat më të mëdha që nga 2011-ta, teksa vendi po përballet me vështirësi ekonomike. /tesheshi.com/
