Nga Mensur Krasniqi
Pa tërheqjen e vendimit për falje të funksionarëv të lartë politik të pushtetit nga ana e presidentit Ivanov dhe pa shtyerjen e zgjedhjeve të parakohshme parlamentare derisa të plotësohen kushtet që garantojnë zgjedhje të lira dhe demokratike, lideri i partisë opozitare maqedonase, Zoran Zaev nuk pranon ftesën e përfaqësuesve të BE-së për takimin e përbashkët të liderëve partiakë të premten në Vjenë.
Se sa është i drejtë dhe i guximshëm ky vendim i Zoran Zaev që të refuzon ftesën e përfaqësuesve ndërkombëtarë, për portalin tesheshi.com flasin analistë, gazetarë dhe përfaqësues të organizatave joqeveritare.
Nano Ruzhin, analist politik maqedonas: Zaevi ka marrë vendimin që e ka porositur populli
“Ajo nuk është kërkesa e Zaevit por e njerëzve që protestojnë, meqë çdo ditë jam me ta dhe e di se si mendojnë. Esenca nuk është se kush do të fiton, por esenca janë reformat. Zaevi është për reforma. Dhe për këtë ai nuk mund të ulet të negocioj me njerëz të inkriminuar. Nga ana tjetër, ekziston edhe ai rreziku se në ato takime mund ti kushtëzohet diçka që nuk është e pranueshme, edhe pse nuk besoj meqë Gruevski dhe Ivanov për momentin nuk kanë asnjë kredit që të kushtëzojnë asgjë dhe askënd, ata janë në pozicione të humbura, dhe dalja e vetme nga kjo krizë janë reformat, dhe më pas kush të fiton le të fiton. Andaj po e ripërsëris: Zaevi ka marrë vendimin e duhur”, deklaroi Nano Ruzhin për portalin tesheshi.com.
Arben Zeqiri, gazetar: Nuk negociohet për një marrëveshje të vdekur
“Përgjigje e merituar për VMRO-në. Nuk mund të vlerësohet si vendim i mirë ose i keq, por ishte vendimi i vetëm që mund të merej në këtë situatë. Nuk mund të shkosh të bisedosh për një marrëveshje të vdekur, apo për zgjedhje të cilat tanimë janë vendosur se kur do të mbahen dhe si do të mbahen. Nuk mund të bisedosh për luftën kundër korrupsionit me kriminel të falur. Përderisa dy vendimet që përmendi Zaev janë në fuqi, për çfarë mund të bisedohet në Vjenë? VMRO ka filluar një strategji, hap një problem të ri për të fituar nga problem i vjetër dhe nëse negocijohet për secilën çmenduri që e bën VMRO-DPMNE, atëherë kjo do të shndërrohet në një spirale pa fund dhe sa herë që VMRO-së ti ngec puna në një problem hap një tjetër”, deklaroi Arben Zeqiri për tesheshi.com.
Orhan Murtezani, kryetar i OJQ-së, për demokraci dhe zhvillim: Zaevi duhhej të këmbëngul të zgjerojë formatin e bisedimeve
“Do e kisha vlerësu si guxim nëse Zaevi do kishte kërkuar që përveç tërheqjes së abolimit të jepnin dorëheqje edhe kryetari edhe qeveria.
Të supozojmë që Zaevit t’i plotësohen këto kushte, dhe çka më tej?!
Sërish do i thotë sektorit civil faleminderit për këtë shërbim tani e tutje vazhdoj vet!? Gjë që e bëri herën e kaluar. Ai duhet të këmbëngulë që së paku të zgjerohet formati i bisedimeve, ndryshe nuk ka kuptim të negociosh me faktorët që në vazhdimësi po e thellojnë krizën politike në vend”, deklaroi Orhan Murtezani pwr tesheshi.com. /tesheshi.com/
