Kryesia e Kuvendit vendosi që kryeministri Isa Mustafa të raportojë nesër në seancë për nënshkrimin e marrëveshjeve me Serbinë në Bruksel. Vendimi është marrë në mënyrë unanime nga mazhoranca dhe opozita parlamentare, ndërsa seanca e kaluar u bllokua nga deputetët e opozitës për shkak se Mustafa nuk u paraqit të jepte shpjegime për marrëveshjet.
Mustafa pritet të raportojë vetëm për marrëveshjet e seanca do të vijojë me rendin e ditës.
Ndërkohë pas përfundimit të mbledhjes së kryesisë, kryeparlamentari Kadri Veseli doli në një konferencë për mediat ku ka justifikuar shtyrjen e raportimit të Mustafës në seancën e kaluar.
“Qeveria nuk po tallet me Kuvendin. Unë besoj që Kuvendi i ka pasur arsyet e veta se pse ka kërkuar që ta shtyjë seancën. Po e ritheksoj ajo që është më kryesore është mirë që Qeveria në raport me deputetët të ketë korrektësi që vetë të dërgojë kërkesën për raportim. Unë nuk besoj që profesori i nderuar u dorëzua para opozitës”, ka theksuar Veseli.
Ai po ashtu ka thënë se bllokimi i kuvendit nuk është zgjidhje dhe se çdo veprim duhet të jetë dinjitoz për shkak se deputetët duhet t’i mbrojnë interesat e qytetarëve të cilët i kanë sjellë ata në Kuvend.
Veseli ka shprehur keqardhje se po debatohet kaq shumë për çështje të thata, e shumë pak për përmirësimin e jetës së qytetarëve./tesheshi.com/
