Kryesia e Kuvendit të Kosovës ka vendosur që seanca e radhës të mbahet të premten më 2, në një vijim të seancës së ndërprerë pas sulmit me vezë ndaj kryeministrit Isa Mustafa. Ky i fundit duket se nuk do të raportojë në Kuvend, për shkak se ndodhet jashtë vendit.
Mbledhja e sotme e kryesisë është zhvilluar pa praninë e përfaqësuesve të opozitës.
Kryetari i Kuvendit, Kadri Veseli argumentoi se raportimi i kryeministrit nuk është futur në rend dite për shkak se kryeministri është jashtë vendit dhe kjo çështje duhet të diskutohet edhe me përfaqësuesit e opozitës.
Kryesia ka vendosur të mos ketë as interpelancë për ministrin e Bujqësisë, Memli Krasniqi.
Pas takimit të kryesisë, Veseli shfrytëzoi një komunikim me mediat për t’i bërë thirrje opozitës të jetë e pranishme në seancat e Kuvendit për të diskutuar, dhe jo për t’i bllokuar.
“Në Kuvend duhet të respektohet rregullorja. Kërkoj nga opozita që t’i drejtohet foltores dhe aty të thotë atë çfarë kanë për të thënë. Nëse ata e bllokojnë foltoren është në dëmin e tyre, sepse qytetarët i kanë zgjedhur që të flasin në Kuvend, dhe jo ta bllokojnë atë”, theksoi Veseli.
Opozita ka paralajmëruar se do të vazhdojë të bllokojë punën e Kuvendit deri në, siç kanë thënë ata, zhbërjen e nënshkrimit të marrëveshjeve me Serbinë dhe asaj për demarkacionin me Malin e Zi. /te sheshi.com/
