Drejtësia shqiptare ka tronditur sërish me vendimmarrjen e saj, pasi ka nxjerrë të pafajshëm njeriun që mendohej se ishte pas goditjes së policisë, në një përballjes mes rendit dhe krimit në Elbasan.
Eshtë fjala për ngjarjen e dy viteve më parë, kur në hyrje të Tregut Agroushqimor në Elbasan, një Audi godet automjetin e zv/shefit të policisë rajonale, në një akt të qartë sfidues të krimit ndaj shtetit.
Por njeriu aludohej që atëherë mediatikisht se ndodhej në timon, Suel Çela, një anëtar i fisit Çela të implikuar në ngjarje kriminale, ka dalë i pafajshëm nga Gjykata e Krimeve të Rënda.
Arsyeja: nuk është vërtetuar dot që ai ka qenë prezent në automjet. Ndërsa ata që u provuan se ishin, Enea Bekteshi dhe Klement Xhaferri, u dënuan njëri me 6 e tjetri me 5 vite burg.
Por jo vetëm kaq. Për koiçidencë, është liruar nga burgu dhe prej famëkeqëve të Elbasanit, Florenc Çapja, anëtar i fisit të bujshëm që është në përplasje prej vitesh me Çelajt. Kjo, për ngjarje pa lidhje me Suel Çelën dhe atë çfarë ndodhi në terrin e natës në Tregun AgroUshqimor.
Florenc Çapja ishte arrestuar nën akuzën e implikimit të vrasjes së policit Fadil Mema. Thuhej madje se kësaj herë nuk do mund t’i shpëtonte burgut, pasi ishte arrestuar për të tretën herë. Argument për lirimin e tij ka qenë fakti se kjo çështje ishte hetuar njëherë, pa mundur të provohet implikimi i Florenc Çapjas.
Kështu, ndodh që në një kohë, një Çela e një Çapja të lënë burgun e të dalin në liri. /tesheshi.com/
