SHBA arrijnë ta bëjnë të tyrin dialogun Prishtinë – Beograd, pasi rinisja është vendosur në Uashington. Kjo u bë me dije nga i dërguari Grenell, i cili shkroi.
“Lajm i mirë! Kam marrë premtimin nga qeveritë e Kosovës dhe të Serbisë për të ndërprerë përkohësisht fushatën e tërheqjes së njohjeve dhe të kërkesave për anëtarësim në organizata ndërkombëtare, në mënyrë që të takohemi në Uashington, në Shtëpinë e Bardhë më 27 qershor për diskutime rreth dialogut”, shkroi ai në tëitter.
“Nëse ndonjëra palë mbetet e pakënaqur me diskutimet e 27 qershorit, atëherë ato do të kthehen në ‘status quo’ pasi të largohen nga Uashingtoni. Siç kemi thënë vazhdimisht, së pari duhet të përparojmë në zhvillimin e ekonomive. Ky është përqendrimi. I pres me padurim këto diskutime”, theksoi njeriu i Presidentit Trump për të ulur në tavolinë krerët e Kosovës dhe Serbisë.
Reagoi menjëherë Presidenti Thaçi, një ithtar i qartë i rolit amerikan, duke shkruar se “udhëheqja dhe mbështetja e Shteteve të Bashkuara ka qenë gjithmonë vendimtare për të ardhmen përparimtare të Kosovës”.
Ndërsa kryeministri Avdullah Hoti shkroi se “veprimtaritë e bashkërenduara me partnerët tanë ndërkombëtarë, veçanërisht me qeverinë e Shteteve të Bashkuara dhe Richard Grenellin, kanë dhënë rezultatet e para, duke bërë që Serbia të ndalë fushatën e saj të tërheqjes së njohjeve. Vazhdimi i dialogut është një hap kryesor për normalizimin e marrëdhënieve dhe njohjen e ndërsjellë”.
Ndodh kjo ndërsa në Prishtinë pritet të mbërrijë i dërguari europain Miroslav Lajçak. Si për ironi, ndërsa jepej kumti amerikan për nisjen e dialogut, e ky në Uashington, Lajçakuti anulohej udhëtimi drejt Prishtinës, së paku për të hënën kur ishte planifikuar. Gjithsesi, ai pritet të mbërrijë këtë të martë, e me interes pritet reagimi i Thaçit, i cili është “përbetuar” të mos e takojë, gjersa gjykon se vendi i tij nuk e njeh Kosovën. /tesheshi.com/
