Theresa May krijoi pështjellim dje kur njoftoi për zgjedhje të parakohshme në qershor të këtij viti, kur më herët e kishte përjashtuar mundësinë e diçkaje të tillë.
Anëtarët e parlamentit janë gati të japin miratimin për zgjedhjet e parakohshme më 8 qershor, thotë BBC-ja sot në një prej raportimeve të saj.
Që planet për këto zgjedhje të bëjnë përpara, duhet që ato të gjejnë miratim te shumica e deputetëve. Një autorizim që bëhet më i mundshëm me reagimin pozitiv të Jeremy Corbyn-it të laburistëve, i cili e ka mirëpritur hapin e kryeministres britanike.
May e ka përligjur thirrjen e zgjedhjeve të parakohshme me sigurimin e mbështetjes së britanikëve për negociatat e Brexit-it.
Në një editorial të britanikes Independent, këto zgjedhje të parakohshme cilësohen si një referendum me një tjetër emër.
“Kryeministrja e ka shprehur qartë në shumë raste se nuk do të kërkonte zgjedhje gjer në 2020-n. Një eskursion në Uells duket t’i ketë ndryshuar mendje, duke e bindur se vetëm zgjedhjet mund të sigurojnë ‘udhëheqje të fortë dhe të qëndrueshme’ të kërkuar për ta parë vendin përmes dhe përtej Brexit-it,” shkruan Independent. /tesheshi.com/
