Gjykata është treguar e “pamëshirshme” me dy të ndaluarit VIP të pak ditëve më parë, kolegen Enkelejda Hoxha të Krujës, si dhe mjekun e njohur kardiokirurg Edvin Prifti. Ky i fundit u zbulua rastësisht për dyshimet e korruptimit, pasi një përgjimi me një prej të ndaluarave të Gjykatës së Krujës, sekretare e kësaj gjykate.
Prifti është arrestuar, sipas vendimit të dhënë nga gjykata. Ndërkohë, avokati i tij Henrik Ligori tha se shuma e madhe e parave të gjetura në shtëpi e tij, rreth 500 milion lekë, nuk mund ta vinte atë nën akuzë.
“Paratë ishin të justifikuara, por gjykata nuk donte që ta merrte parasysh, pa pasur një hetim për këtë çështje, për një bisedë mes disa personave. Nuk ka asnjë fakt, ka vetëm një dëshirë të një personi të caktuar për të dhënë lekë. Fakti që mbahen në shtëpi, nuk është një vepër penale. Z. Prifti nuk është një person të cilin ligji e detyron që të tregojë pasurinë. Ne do të ndjekim rrugët ligjore, do ta apelojmë”, tha avokati Ligori.
Më herët, foli dhe vetë Dr. Prifti, duke aluduar se mund të jetë viktimë e fushatës elektorale.
“Jemi në fushatë elektorale. Unë do të preferoj që prangat të m’i vinte massmedia, do të ishte më simpatike për të gjithë popullin”, tha Prifti me ironi.
Reagimi i tij erdhi nga fakti se ai u përmend dhe nga kryeministri Rama.
“Bashkë me gjykatësen, u arrestua edhe një mjek, që ju gjetën në shtëpi paratë e dynjasë. Është një lajm shumë i mirë për sistemin, kjo do të rrisë besimin e njerëzve që të denoncojnë dhe faktikisht në rastin e mjekut ka pasur një denoncim të cilin e ka përcjellë drejtori i spitalit në sistem, të cilin tha ‘shikojeni nuk jam unë që ta provoj por shikojeni, është nuk është’”, komentoi Rama.
Në burg u la dhe gjykatësja Hoxha dhe kolegë të saj gjithashtu të ndaluar nga Gjykata e Krujës. Mbrojtja kërkoi që ajo, për shkak të disa rrethanave familjare, të kalonte në arrest të shtëpie, pork jo nuk ndodhi.
“Gjyqtarja nuk meriton arrestin me burg për shkaqe humane që lidhet me kushtet shëndetësore të njërit prej fëmijëve të saj dhe tjetrit që e ka të mitur”, tha avokati Ardian Visha.
Më herët, për gjykatësen Hoxha foli i ati i saj.
“Kam punuar që fëmijët e mi të jenë të edukuar, nipi im ka sot ditëlindjen, nuk priste ta festonte në këtë mënyrë”, është shprehur i ati i gjyqtares. /tesheshi.com/
