Qeveria suedeze ka njoftuar se do të ekstradojë në Turqi një mbështetës të Partisë së Punëtorëve të Kurdistanit (PKK), i cili u dënua për kontrabandë droge në vendin e tij, duke përmbushur de facto kushtin e vendosur nga Ankaraja për hyrjen e Suedisë në NATO.
“Qeveria ka vendosur të miratojë ekstradimin e një shtetasi turk 35-vjeçar”, tha një zyrtar i Ministrisë së Drejtësisë, transmeton Hina.
Kurdi 35-vjeçar është simpatizant i PKK-së dhe Partisë Demokratike Popullore (HDP) dhe në vitin 2014 u dënua me katër vjet e gjysmë burg në Turqi pasi u zbulua me një qese të mbushur me marijuanë.
Pasi u lirua në fillim të vitit 2018 për shkak të sjelljes së mirë, ai shkoi në Suedi. Ai u arrestua atje në fund të gushtit 2022 me kërkesë të Ankarasë, e cila kërkon ekstradimin e tij për të vuajtur pjesën e mbetur të dënimit.
Nuk ka pengesa për ekstradim
Gjykata e Lartë suedeze vendosi në fillim të qershorit se nuk ka pengesa për ekstradimin e tij dhe se Suedia nuk po shkel as ligjet suedeze dhe as Kartën Evropiane për të Drejtat e Njeriut.
Kurdi pretendon se Ankaraja po e persekuton vetëm për shkak të përfshirjes së tij politike, pra promovimit të çështjes kurde.
Vendimi i gjykatës suedeze u mor pasi Rexhep Tajip Erdogan fitoi sërish zgjedhjet presidenciale në maj.
Turqia ka bllokuar hyrjen e Suedisë në NATO për 13 muaj për shkak të butësisë ndaj aktivistëve kurdë në tokën e saj.
Ankaraja po kërkon dhjetëra mbështetës të PKK-së që jetojnë në Suedi dhe të cilët i konsideron “terroristë”. /tesheshi.com/
