Organizata Botërore e Shëndetit (OBSH) shpalli mbrëmë një krizë globale shëndetësore mbi koronavirusin kinez, vatra e të cilit është në qytetin Wuhan.
Kina raportoi rastet e para të infeksionit koronavirus në OBSH në fund të dhjetorit. Në total, është konfirmuar se numri i të infektuarve në të gjithë botën ka arritur pothuajse në 10,000, që do të thotë se më shumë njerëz janë të infektuar me koronavirus sesa SARS gjatë epidemive 2002 dhe 2003.
Në Kinë, 213 njerëz kanë vdekur dhe numri i përgjithshëm i rasteve të konfirmuara me infeksion ka shkuar ë 9.820.
Jashtë Kinës, më shumë se 100 raste janë raportuar në 22 vende të tjera. Italia, Filipinet, India, Vietnami dhe Koreja e Jugut kanë konfirmuar rastet e tyre të para.
SHBA, Japonia dhe Koreja e Jugut tashmë kanë evakuuar disa prej qytetarëve të tyre nga Wuhan-i. Vende të tjera si Australia, Kanada, Franca dhe Mbretëria e Bashkuar po përgatisin gjithashtu plane evakuimi për qytetarët e tyre.
OBSH përcakton krizën globale të shëndetit si një “emergjencë” që paraqet një rrezik për vendet e tjera dhe kërkon një reagim të koordinuar ndërkombëtar.
Shpallja e gjendjes globale të jashtëzakonshme shpesh nënkupton që shumë më shumë para dhe burime do të investohen në parandalimin e përhapjes së virusit, por mund të inkurajojë dhe qeveritë që të kufizojnë udhëtimet dhe tregtinë me vendet e prekura.
Ekspertët thonë se ka prova në rritje se virusi po përhapet te njerëzit në Kinë, dhe se ekziston shqetësimi se virusi transmetohet nga personi në person dhe në vendet e tjera, përfshirë Japoninë, Gjermaninë, Vietnamin dhe Shtetet e Bashkuara.
Deri më tani, OBSH ka shpallur gjendje të jashtëzakonshme për epideminë e Ebola-s, virusit Zika dhe H1N1 (gripit të derrit).
Shefi i OBSH-së Tedros Adhanom Ghebreyesus e përshkroi koronavirusin si një “epidemi të paparë”.
“Arsyeja kryesore për të shpallur një gjendje të jashtëzakonshme nuk është situata në Kinë, por ajo që po ndodh në vendet e tjera,” tha ai.
“Ne nuk e dimë se çfarë dëmi mund të bëjë virusi nëse ai përhapet në një vend me një sistem shëndetësor të dobët. Ne duhet të përgatitemi për këtë mundësi. Dhe për këtë arsye, unë shpall një gjendje të jashtëzakonshme”, shtoi ai.
“Rritja e vazhdueshme e numrit të rasteve dhe dëshmitë e transmetimit njeri-njeri në njerëz jashtë Kinës është shumë shqetësuese. Megjithëse numrat jashtë Kinës janë ende relativisht të vogla, ato kanë potencial për një epidemi shumë më të madhe”, shpjegon ai. /tesheshi.com/
