Drejtuesja e Krimeve të Rënda, prokurorja Donika Prela, mundi ta kalojë vettingun duke u konfirmuar në detyrë, një vendim që pritej me interes të madh pas “shijes së keqe” lënë të ndërkombëtarët e OMN-së.
Vëzhguesi Theo Jacobs, kur u njoh me rastin e saj, më saktë të bashkëshortit që nuk kishte paguar taksat për një periudhë kohe, tha:
“Jam i sigurt që ju keni provuar që të pini ilaçe në mëngjes dhe ato ilaçe të lënë një shije të keqe dhe s’mund ta pish mirë kafen dhe pas drekës shija përmirësohet. Kam lexuar dosjen tuaj dhe ne akoma nuk kemi arritur në kohën e drekës për të shmangur dyshimet, për të larguar shijen e keqe në gojën time.
Pse bashkëshorti juaj e ka marrë pagën në të holla dhe pse ai ka pasur llogari bankare? Mund të duket pyetje pa vend, por nuk janë paguar taksat. Kjo më le shije të keqe. Ju keni dhënë shpjegime, por unë e kam theksin tek taksat. Bashkëshorti juaj ka paguar taksa vetëm për lekët që ka marrë në bankë. Më bëni të kuptoj nëse bashkëshorti juaj është viktimë apo është pjesë e skemës që ka bërë evasion fiskal?”
Fjala ishte për rastin kur bashkëshorti i zonjës Prela, Vangjel Prela, prej vitit 2003 e deri në vitin 2011 kishte marrë pagesën në cash nga një kompani ndërtimi, duke shmangur kështu pagesën e sigurimeve shoqërore dhe tatimet.
Por përgjigje e prokurores Prela si përfaqsuese e ligjzbatimit ishte gati shokuese:
“Unë e bashkëshorti im kemi jetuar në Shqipëri, jo në vendet e BE”, tha ajo.
Megjithatë, kjo qasje amorale ndaj ligjit, prej një përfaqsueseje të saj, nuk është marrë parasysh nga Komisioni i Vlerësimit.
“Pas një denoncimi publik, trupi gjykues njoftoi shtyrjen e seancës për zonjën Prela për ditën e sotme duke konsideruar të nevojshëm verifikimin e këtij denoncimi nëse duhej hapur hetimi. Verifikimet u kryen javën e kaluar dhe çuan në përfundimin se nuk ekziston asnjë indicie që mund të çojë në hapjen e hetimeve. Në datë 4 shkurt trupi gjykues u mblodh për të marrë vendimin për Prelën. Pas hetuam, dëgjuam dhe vlerësuam dokumentet në përfundim e konsiderojmë të përfunduar seancën e rivlerësimit. Donika Prela konfirmohet në detyrë”, u shpreh trupa gjykuese e KPK, duke e lënë në detyrë gruan që drejton Krimet e Rënda. /tesheshi.com/
