Mbretëria e Bashkuar u bë vendi i parë në botë që aprovoi vaksinën Pfizer / BioNTech për përdorim të gjerë.
Rregullatori britanik, MHRA, thotë se vaksina, e cila ofron mbrojtje deri në 95 për qind kundër sëmundjes COVID-19, është e sigurt për t’u përdorur, shkruan BBC.
Vaksinimi mund të fillojë brenda disa ditësh për njerëzit nga grupet me përparësi të lartë.
Britania e Madhe tashmë ka porositur 40 milion doza – të mjaftueshme për të vaksinuar 20 milion njerëz, me dy injeksione secili.
Rreth 10 milion doza duhet të jenë në dispozicion së shpejti, dhe dozat e para do të mbërrijnë në MB në ditët në vijim.
Moderna dhe Pfizer-BioNTech janë në një garë të ngushtë për të përdorur vaksinat e tyre COVID-19 në Evropë, pasi të dy kompanitë kërkuan miratimin e menjëhershëm të Bashkimit Evropian të martën, megjithëse mbetet e paqartë nëse vaksina mund të fillojë këtë vit.
Raportimet në Agjencinë Evropiane të Barnave (EMA) erdhën një ditë pasi Moderna kërkoi përdorimin urgjent të vaksinës së saj në SHBA dhe më shumë se një javë pasi Pfizer dhe BioNTech bënë të njëjtën gjë.
Kompania farmaceutike amerikane Pfizer dhe partneri i saj gjerman BioNTech thanë se vaksina e tyre mund të përdoret në Bashkimin Evropian që nga ky muaj. /tesheshi.com/
