Qeveria shqiptare vendosi që të shtyjë masat kufizuese në shumë sfera të aktiviteteve jetësore, ekonomike e jo vetëm, deri në përfundim të plotë të epidemisë së koronavirusi.
Ishte parashikuar 3 prilli si afat i “rikthimit në jetë”, kjo që kur nisën masat në ditët e para të marsit, por agravimi i mëtejshëm i situatës, ndonëse jo dramatikisht, ka bërë që stop-i i jetës jashtë shtëpisë të zgjatet.
Ishte ministrja e Shëndetësisë Ogerta Manastirlliu ajo që shpalli:
“Dua të informoj qytetarët se nga sot shtyhen pa afat urdhrat për masat ndaluese me qëllim kufizimin e përhapjes së COVID-19.
Qëndrojnë të mbyllura deri në përfundimin e epidemisë:
Çerdhet, kopshtet dhe shkollat – të gjitha institucionet arsimore publike dhe jo publike.
Baret, restorantet, lokalet, fast-food-et dhe strukturat akomoduese që ofrojnë shërbim për klientët.
Do të jenë të ndaluara deri në përfundimin e epidemisë aktivitetet publike dhe jo publike dhe anulimi i grumbullimeve masive në vende të mbyllura apo të hapura.
Shtyhen deri në përfundimin e kësaj situate edhe urdhrat për ndërprerjen e ndërhyrjeve kirurgjikale të planifikuara në të gjithë strukturat spitalore publike dhe jo publike.
Dua të sqaroj për qytetarët se duke filluar nga dita e sotme: Të gjithë familjet dhe individët që përfitojnë ndihmën ekonomike do të përfitojnë pagesën e ndihmës ekonomike pa pasur nevojë që qytetarët të paraqiten për të kryer aplikimin për përfitimin e kësaj pagese, pasi ai do të jetë online.
Sipas urdhrit që kam firmosur administratorët shoqërorë të njësive adminstrave janë përgjegjës për kryerjen e aplikimeve për ndihmë ekonomike duke mundësuar ata vetë kontaktin elektronik ose me telefon për t’iu ardhur në ndihmë të gjithë aplikuesve për përfitimin e ndihmës ekonomike.
Përjashtimisht, gjatë situatës së fatkeqësisë natyrore, aplikimet për ndihmë ekonomike, do të pranohen nga administratorët shoqërorë të njësive administrative në formë elektronike ose përmes shërbimit postar.
Rreth 64 mijë familje do të përfitojnë nga dyfishimi i pagesës së ndihmës ekonomike përgjatë gjithë periudhës së fatkeqësisë natyrore.
Edhe për personat me aftësi të kufizuar, pagesat do të vazhdojnë pa ndërprerje dhe rikomisionimet e personave me aftësi të kufizuara do të zhvillohen pasi të kalohet gjendja e fatkeqësisë natyrore.
Nga ana tjetër, kryeministri Rama ka paralajmëruar ditët e fundit se nëse pas javës së dytë të prillit do ketë rënie të kurbës së të infektuarve, do ketë një lirimin gradual nga masat kufizuese. /tesheshi.com/
