Barack Obama kritikoi vendimin “zemërthyes” të gjykatës së lartë që do të bllokojë njohjen legale për 4 milionë emigrantë që jetojnë në Shtetet e Bashkuara, por këmbënguli se është vetëm çështje kohe përpara se kjo reformë afatgjatë të pranohet.
Duke reaguar ndaj vendimit të ngushtë të gjykatës së lartë që përkrah kundërshtinë e gjykatave të shkallës më të ulët ndaj planit të tij, presidenti tha se do të vijojë të instruktojë zyrtarët e zbatimit të ligjit të mos e bëjnë prioritet deportimin e personave pa dokumente që kanë jetuar në Shtetet e Bashkuara për më shumë se pesë vjet.
Megjithatë, ai pranoi se kundërshtia e suksesshme e republikanëve përmes gjykatës tashmë do ta bëjë më të vështirë që familjet në këto kushte të kërkojnë një status më të qartë ligjor, çka synonte edhe veprimi i tij ekzekutiv.
“Vendimi i sotëm është frustrues pë rata që kërkojnë të rrisin ekonominë tonë, për të sjellë racionalitet në sistemin tonë të emigracionit dhe për të lejuar njerëzit të dalin nga hija që hedh vazhdimisht mbi ta ky status”, tha ai në një deklaratë të përgatitur me shpejtësi në Shtëpinë e Bardhë.
“Eshtë zemërthyese për miliona emigrantë që nxjerrin jetesën këti, që kanë ngritur familjet këtu e që shpresojnë të kenë një mundësi për të punuar, paguar taksat, shërbyer në ushtrinë tonë e për të kontribuar gjerësisht për këtë vend në mënyrë të hapur”.
Sipas tij, reforma e emigracionit shpejt a vonë, do të bëhet. “Kongresi nuk do të jetë në gjendje të injorojë përgjithmonë Amerikën. Çështja është kur”, tha ai.
Edhe Hillary Clinton gjithashtu reagoi ndaj ndarjes 4 me 4 mes anëtarëve aktualë të gjykatës së lartë, duke e cituar si shembull se çfarë luhet në valle në zgjedhjet e nëntorit.
Por, republikanët e vlerësuan vendimin si një fitore të rregullit “checks and balances” në kushtetutë. “Vendimi i gjykatës së lartë që mban në fuqi vendimin aktual është një fitore për populli amerikan dhe sidomos për punëtorët amerikanë”, tha kreu i komitetit të Drejtësisë, Chuck Grassley.
Opinioni përfaqëson një goditje domethënëse ndaj Obamës në muajt e tij të fundit në detyrë. Vendimi lejon republikanët të pretendojnë fitore për argumentin e tyre se propozimi tejkalon pushtetin presidencial dhe nuk arrin të mbrojë kufijtë e Amerikës.
Dhe, veç të tjerash, vjen në një vit elektoral, në të cilin emigracioni ka provuar të jetë një çështje ku palët ndahen hidhur në betejën që po zhvillohet për zëvendësuesin e Obamës.
Gjykata dëgjoi argumentet në muajin prill në lidhje me kërkesën për riaktivizimin e planit Obama për të mbajtur 4 milionë emigrantë pa dokumente – që kanë jetuar ilegalisht në Shtetet e Bashkuara të paktën që prej vitit 2010, që nuk kanë precedentë penale dhe që kanë fëmijë që janë qytetarë amerikane apo banorë të ligjshëm. Këta persona do të kurseheshin nga deportimi masiv që do të ndante shumë familje.
Presidenti ndërmorri veprim të njëanshëm pasi republikanët në Kongres ngrinë legjislacionin bipartizan që mundësonte një rrugëzgjidhje për marrjen e shtetësisë për emigrantët pa dokumente, miratuar në senat në vitin 2013.
Por, veprimi i tij ekzekutiv u sfidua nga 26 shet, të gjitha të drejtuara nga guvernatorë republikanë.
Çështja përbën një pikë pazaresh politike në një vit elektoral në të cilin kandidati republikan, Donald Trump është zotuar të ndërtojë një mur dhe të deportojë totalisht 11 milionë emigrantët pa dokumente, duke i përshkruar emigrantët meksikanë si “përdhunues”.
Hillary Clinton sulmoi ashpër duke thënë se Trump synon të ndajë familjet, të ndajë prindërit nga fëmijët, të nxjerrë nga shkollat fëmijët dhe nga puna të rriturit. “Ai madje ka thënë se do të ndryshojë një vlerë fondamentale amerikane – që nëse ke lindur këti, pavarësisht se cilët janë prindërit e tu dhe nga kanë ardhur, ti je amerikan”, tha ajo.
Trump u kundërpërgjigj me një deklaratë ku pretendonte se vendimi i gjykatës kishte bllokuar “një nga veprimet më antikushtetuese në histori të ndërmarrë nga një president”.
Ai shtoi se vendimi vë në dukje se çfarë zgjedhjeje duhet bërë në nëntor. “Zgjedhjet dhe caktimet në Gjykatën e Lartë që vijnë së bashku me to do të vendosin nëse ne do të kemi një kufi, një gardh, apo një vend”.
Përgatiti: Juli Prifti – /tesheshi.com/
