Klemend Balili, personi që për gati tre vite u shndërrua në një mit urban, pasi nën nofkën e vënë nga media greke si “Eskobari i Ballkanit” iu fsheh paq policisë derisa u vetëdorëzua, do vuajë 10 vite burg nën akuzën e trafikut të drogës.
Ishte Gjykata e Krimeve të Rënda ajo që dha verdiktin për një dekadë pas hekurave, ndaj njeriut që sfidoi shtetin për afro tre vjet.
Prokuroria kërkoi 18 vite, por gjykata vendosi 15. Dhe, pasi u pranua kërkesa për gjykim të shkurtuar, u ul 1/3 duke u dënuar përfundimisht me 10 vite burg.
Më konkretisht, Balili akuzohet për rastin e trafikimit të 700 kg kanabis, ku si provë fajësie u renditën përgjimet telefonike të realizuara nga autoritetet greke në kuadër të një hetimi që po kryhej atje për një organizatë kriminale që trafikonte hashash e kokainë.
Por akuza u kundërshtua nga avokatët mbrojtës të cilët deklaruan se prokuroria nuk arrin të faktojë se personi i përgjuar është 47-vjeçari Klemend Balili. /tesheshi.com/
