UEFA së shpejti do t’i dërgojë një propozim FIFA-s për një format të ri për kualifikimet evropiane për Kupën e Botës 2026.
Sipas këtij formati, 16 përfaqësues evropianë për turneun, i cili do të organizohet bashkërisht nga SHBA-ja, Kanadaja dhe Meksika në vitin 2026, do të fitoheshin përmes garave në grupe dhe play-off-it.
Fituesit e 12 grupeve të përbëra nga katër ose pesë kombëtare do të kualifikoheshin direkt. Faza në grupe e kualifikimit do të zhvillohej në periudhën nga marsi deri në nëntor 2025.
Kombëtaret e vendit të dytë, 12 prej tyre dhe katër kombëtaret më të mira nga Liga e Kombeve në sezonin 2024/25, të cilat nuk u kualifikuan përmes kualifikimeve, do të garonin në play-off për katër vendet e mbetura në mars 2026.
Athina dhe Wroclaw, finalen e radhës të Ligës së Konferencës
UEFA gjithashtu ka emëruar Athinën dhe Wroclaw për të pritur dy finalet e ardhshme të Ligës së Konferencës, ndërsa Lisbonës i është dhënë finalja e Ligës së Kampionëve 2025.
Stadiumi Jose Alvalade, ku Sporting luan ndeshjet e tij në shtëpi dhe ka një kapacitet prej më shumë se 50 mijë shikues, do të presë ndeshjen që do të vendosë titullin e fituesit të Champions League për vitin 2025. Tashmë është vendosur që finalja e edicionit të ardhshëm e Champions League do të luhet në vitin 2024 në Bilbao të Spanjës.
Liga e Konferencës, kompeticioni më i ri i klubeve i organizuar nga UEFA, do të ketë fituesin e radhës në vitin 2024 në stadiumin e ri të AEK-ut në Athinë. Një vit më vonë, finalja do të luhet në Wroclaw të Polonisë.
Rikthimi i vendit “në këmbë” në stadiume
Bordi ekzekutiv i shoqatës UEFA vendosi gjithashtu që sezonin e ardhshëm klubet nga Gjermania, Franca dhe Anglia të mund të përdorin pjesë të tribunave me vende në këmbë, siç përdorin në garat vendase, në ndeshjet e tyre në garat evropiane. Është ky një program eksperimental.
Nga ky vendim mund të përfitojë më së shumti klubi gjerman i divizionit të parë, Union Berlin, sepse mund të përdorë stadiumin e tij An der Alten Foersterei, i cili ka një kapacitet për 22,000 spektatorë, ku 18,395 prej tyre janë të destinuara vetëm për qëndrim në këmbë.
Ndryshe, Unioni do të luante ndeshjet në shtëpi në garën elitare evropiane në stadiumin Olimpik të Berlinit. /tesheshi.com/
