Një shumicë bindëse e austriakëve janë kundër zgjerimit të Bashkimit Evropian, i cili, në kundërshtim me avokimin verbal të zyrtarëve në Vjenë, vlen edhe për të gjitha vendet e Ballkanit Perëndimor, sipas një sondazhi të Shoqatës Austriake për Politikat Evropiane (OGfE).
Mbështetja e austriakëve për hyrjen e vendeve të Ballkanit Perëndimor në BE varion nga 16 për qind në rastin e Kosovës, në 29 për qind për Bosnjën dhe Hercegovinën, që është edhe mbështetja më e lartë për anëtarësimin e një vendi në rajon në BE, sipas rezultateve të publikuara të hulumtimit.
Lëkundje të vogla
Opinioni i publikut në Austri për hyrjen e Serbisë, Malit të Zi, Shqipërisë dhe Maqedonisë së Veriut në BE nuk tregon luhatje të mëdha.
Hyrja e Serbisë në BE u mbështet nga 24 për qind e të anketuarve, 48 për qind u shprehën kundër dhe 17 për qind thanë se nuk u intereson. 11 për qind e pjesëmarrësve në anketë nuk e dinin përgjigjen, ose nuk donin ta jepnin. Mali i Zi, me 23 për qind, ka vetëm pak më pak mbështetje se Serbia, 44 për qind e të pyeturve u shprehën kundër hyrjes së tij, ndërsa 21 për qind ishin indiferentë ndaj çështjes.
Mbështetja për anëtarësimin e Shqipërisë në BE është 22 për qind, 51 për qind janë kundër, ndërsa në rastin e Maqedonisë së Veriut, 21 për qind e qytetarëve e mbështesin dhe 47 për qind janë kundër.
“Austria zyrtare prej kohësh e ka parë veten si një mbështetëse të bindur të zgjerimit të BE-së, veçanërisht kur bëhet fjalë për hyrjen e vendeve të Ballkanit Perëndimor. Megjithatë, popullata, pothuajse tradicionalisht, ka një mendim të ndryshëm për këtë çështje”, tha Sekretari i Përgjithshëm i OGfE, Paul Schmidt.
Hulumtim çdo vit
Ai tha se mbështetja për hyrjen e Ballkanit Perëndimor në Union në Austri “ka qenë pak a shumë e dobët për vite me radhë” dhe se tema e zgjerimit të BE-së në mesin e popullatës përgjithësisht gjen një përgjigje të dobët.
Hulumtimi i opinionit publik për pranimin e Ballkanit Perëndimor dhe Turqisë është kryer rregullisht nga OGfE që nga viti 2010, dhe tani anketa përfshin Ukrainën, Moldavinë dhe Gjeorgjinë, të cilave u hap perspektiva e anëtarësimit në BE vetëm vitin e kaluar.
Sondazhi përfshiu 1000 qytetarë të moshës 16 deri në 80 vjeç nga 11 deri më 13 prill. /tesheshi.com/
