Ndërsa dhjetëra persona mbetën të vdekur nga një kamion që e mori përpara turmën në Nicë në orët e vona të së enjtes, e shumë të tjerë janë ende mes jetës dhe vdekjes, vendet arabe, ashtu si pjesa tjetër e botës, nuk kanë vonuar ta dënojnë këtë akt makabër.
Presidenti tunizian, Bexhi Xhaid Essebsi, deklaroi se, “Çfarë e dëmton popullin francez, na dëmton po ashtu ne.”
“Akte të tilla ekstremizmi,” u shpreh ai, “nuk bëjnë dallim midis feve, kombësive apo shteteve.”
Veçmas, një deklaratë e Ministrisë së Jashtme tuniziane shprehu solidaritetin me Francën në përpjekjet për të luftuar ekstremizmin.
“Tunizia i mbështet të gjitha veprimet e ndërmarra nga qeveria franceze për të garantuar integritetin territorial të vendit dhe sigurinë e qytetarëve të saj,” thuhej në të.
Arabia Saudite, në të njëjtën kohë, shprehu solidaritetin me Francën përballë ekstremizmit.
“Të shëmtuar dhe kriminal” e quajti aktin Ministria e Jashtme e Kuvajtit, duke e dënuar atë.
Një zëdhënës i qeverisë jordaneze tha se sulmi i djeshëm ishte një provë tjetër se ekstremistët i vënë në shenjë të pafajshmit dhe kërcënojnë paqen botërore.
Ngushëllime për familjet e viktimave, për popullin francez dhe për presidentin Hollande përcolli presidenti i Autoritetit Palestinez, Mahmud Abbas.
“Akte të tilla burracake nuk bëjnë dallim midis njerëzve me fe apo kombësi të ndryshme, dhe nuk sjellin asgjë tjetër veç shkatërrimit,” thuhet në reagimin e Ministrisë së Jashtme egjiptiane.
Ez’heri, një prej qendrave të dijes në botën islame, e dënoi po ashtu aktin, duke përsëritur kundërshtimin kategorik të të gjitha formave të dhunës dhe të ekstremizmit. /tesheshi.com/
