Kryebvashkiaku i Tiranës Erion Veliaj i dhuroi Çelësin e Qytetit ambasadorit të Katarit bë Tiranë, Ali bin Hamad Al Marri, i cili përmbylli mandatin e tij në kryeqytetin shqiptar, duke lënë pas kontribute të shumta.
“Sot është patjetër një ditë gëzimi, se ne vlerësojmë një mik të shtrenjtë, por është edhe një ditë kur një miku të shtrenjtë, ne i themi faleminderit, mirupafshim deri herën tjetër, sepse ambasadori i Katarit mbyll shërbimin e tij në Tiranë. Ai ka marrë të gjitha falenderimet e ministres sonë të Jashtme, kryeministrit, Presidentit të Republikës, por unë ndjej posaçërisht një falënderim dhe një mirënjohje të veçantë për të. Në qytetin e Tiranës kemi pasur edhe një raport njerëzor dhe një kontribut konkret për gjitha punët e bukura që, nëpërmjet ndihmës së Katarit, kemi arritur t’i bëjmë në Tiranë”, tha Veliaj.
Më pas, njeriu numër një i kryeqytetit shqiptare renditi një për një kontributet e diplomatit arab në Shqipëri, duke theksuar se do mbahet mend për “shkollat, kopshtet konkrete, për ndihmat që kemi shpërndarë në ditët e tërmetit e të pandemisë, për vaksinat, për gjithë organizimet që bëmë rreth Kupës së Botës në Katar, për ditët e sportit që kemi festuar, për ndihmën që na dha për Vitin e Rinisë dhe për këtë vit ku Tirana është qyteti Evropian i Sportit”, tha Veliaj, duke shtuar:
“Jam vërtet mirënjohës dhe nëse për shumë prej nesh që merren me fjalime, fjalimet harrohen dhe shumë diplomatë që bëjnë fjalime, fjalimet i zënë vendin fjalimit tjetër, ndërkohë që kopshti që kemi bërë në Bllok, shkolla ‘Lasgush Poradeci’, shkolla në Pezë, ‘Jeronim De Rada’ dhe më në fund lajmi i shkëlqyer për Sheshin e Katarit që do të kemi në fund të Bulevardit të Ri, një donacion prej 11 milionë eurosh nga qeveria e Katarit, do të mbeten jo vetëm kur mbarojnë mandatet tona si ambasadorë dhe si kryetarë bashkie, por do të mbeten edhe kur të mos jemi më në këtë jetë, sepse janë kontribute që do të zgjasin përtej jetës sonë dhe do të jenë këtu ndoshta në dhjetëra e qindra vitet e ardhshme”.
Nga ana e tij, ambasadori Ali bin Hamad Al Marri e quajti Veliajn një “vëlla”
“Patjetër që do të vij për vizitë personale tek vëllai im, në ditët e ardhshme. I uroj gjithë suksesin e mundshëm vëllait tim Erionit…”. /tesheshi.com/
