Kryetari i Bashkisë, Erion Veliaj konfirmoi për gazetarët kërkesën e Prokurorisë së Tiranës për hetimin e lejeve të ndërtimit të dhëna nga pararendësi i tij në detyrë, Lulzim Basha. Sipas Veliajt, janë 17 leje ndërtimi për të cilat po hetohet.
“Sigurisht i kam kërkuar stafit të Bashkisë që të bashkëpunojë plotësisht me prokurorinë. Mesa duket, kjo ishte e pamundur me bashkinë e kaluar, me të cilën s’ka pasur bashkëpunim. Ndërsa stafi aktual i bashkisë po përgatit dosjet për të 17 lejet që ka kërkuar të hetojë prokuroria”, tha Veliaj.
Kryetari i Bashkisë së kryeqytetit i bëri këto komente ndërsa njoftoi nisjen e punimeve për projektin e Pazarit të Ri, projekt që synon ta kthejë atë në një hapësirë tërheqëse turistike për kryeqytetin. /tesheshi.com/
