Pas pak javësh, aksionit për pastrimin e kryeqytetit pritet t’i bashkohet edhe një kompani publike. Kryetari i bashkisë , Erjon Veliaj tha se nisma vjen si një bashkëpunim mes Bashkisë së Tiranës dhe asaj të së Veronës, ndërkohë që janë porositur edhe mjete të tjera me qëllim përmirësimin e kushteve. “Në muajin dhjetor kompania publike, bashkë me Bashkinë e Veronës, do të fillojë operimin në Tiranë. Kemi porositur edhe disa mijëra kosha dhe disa dhjetëra mjete të tjera. Nuk po kursejmë asgjë, që të administrojmë me sukses ato që ka në dorë bashkia. Ashtu si në një familje nuk është detyra vetëm e nënës nikoqire që të pastrojë, por secili duhet të kontribuojë”, tha Veliaj.
Këto deklarata ai i bëri, teksa mori pjesë në aksionin e lajmëruar vullnetar për pastrimin e 24 njësive administrative të kryeqytetit. Puna nisi në orën 8.00 të mëngjesit, nga Kombinati, me pastrimin e varrezave të Sharrës. Kryebashkiaku falenderoi të gjithë qytetarët që vendosën t’i bashkohen aksionit të pastrimit. “Siç kemi një qytet të të gjallëve, kemi edhe një qytet të atyre që s’janë më, kjo është simbolika pse aksionin e pastrimit e filluam nga varrezat e Tiranës, që sot janë shumë herë më të pastra. Në varrezat e Sharrës do të vazhdojmë me një investim, si në Tufinë, për të pasur një hapësirë të këndshme, ku qytetarët të kenë kohë për të kujtuar të afërmit e tyre, në një ambient higjenik dhe shumë herë më estetik se sa ai që kemi sot. Nga Kombinati vijuam në disa lagje të tjera të Tiranës. Ajo që kuptojmë nga çfarë gjejmë poshtë pallateve është se tiranas apo kryeqytetas nuk të bën adresa, as makina e as celulari i shtrenjtë, as pallati luksoz, por sjellja qytetare”, tha Veliaj.
Nisur edhe nga reshjet e fundit ku mbeturinat shkaktuan mjaft probleme në bllokimin e kanalizimeve, Veliaj u kërkoi qytetarëve që të reduktojnë përdorimin e plastikës.
“Mund të na ndihmojnë edhe ata që nuk kanë dale për pastrim, mjafton të mos bëjnë pis. Të reduktojmë përdorimin e plastikës, e ambalazheve të tepërta”, tha ai./tesheshi.com
