Kreu i Bashkisë së Tiranës Erion Veliaj, paralajmëroi se 2020 do jetë viti i Teatrit të Ri, e po ashtu dhe i Unazës së Re. E ndërsa në këtë të dytën çështja është zgjodhur me forcën e muskujve të shtetit, te e para reziztenca vijon, jo me emra anonimë qytetarësh pa status publik, por me njerëz të njohur të artit skenik e gjithashtu nga shoqëria civile. Megjithatë, Veliaj është treguar i prerë.
“Sot dua ta bëj të qartë se çdokush që pengon zhvillimin do të ketë fatin dhe përfundimin e asaj që ndodhi para pak ditësh te Astiri. Tirana nuk ndalet! Qytetarët duan zhvillimin, duan rrugët, duan Piramidën, duan Teatrin, duan Bulevardin e Ri dhe zhvillimin aty, duan transformim në çdo lagje e çdo cep të qytetit. Askush nuk do të guxojë që të ndalë “orën” e Tiranës”, theksoi Veliaj në mbledhjen e Këshillit Bashkiak.
“Jam i vendosur, unë besoj dhe ju që t’i shkojmë deri në fund çdo projekti që transformon Tiranën dhe e bën atë më të mirë për fëmijët tanë. Megjithatë, kemi parë shpeshherë që për çdo projekt madhor të Tiranës, si dikur, protestat te këndi i lodrave e lodrat te Liqeni apo Sheshin Skënderbej, të ngrihen çeta me individë që duan të ndalojnë punët e qytetit.
Tani është bërë si modë që sa herë ka një punë të madhe në qytet, ngrihet një çetë respektive, e vogël që e kundërshton, në kurriz të shumicës së heshtur që do zhvillimin e Tiranës.
Janë të njëjtët që duan të pengojnë zhvillimin, hiqen si të dashuruar pas artit, njëherë si të dashuruar pas mjedisit. Janë të njëjtët njerëz dhe kur vjen fjala për punë, është e fundit që e duan, pasi janë të interesuar vetëm për pengim dhe bllokim”, deklaroi Veliaj.
Nga ana tjetër, grupimi i atyre që nuk duan shembjen e godinës ekzistuese, vijojnë rezistencën e tyre, duke u përbëtuar se nuk do e lejojnë shembjen, për ta mbrojtur teatrin dhe me trupat e tyre. /tesheshi.com/
