Komuniteti Mysliman u bashkua me nismën e Bashkisë për të shtuar gjelbërimin në qytet, duke mbjellë 100 pemë të reja në parkun e Farkës. Kryebashkiaku Erion Veliaj, i shoqëruar edhe nga kreu i Myftinisë së Tiranës, Ylli Gurra, mbollën në mënyrë simbolike nga një pemë, si simbol i jetës dhe i shpresës. Duke marrë shkas nga situata politike në të cilën ndodhet vendi, Veliaj theksoi se është më mirë të mbjellim pemë se sa konflikt.
Veliaj siguroi banorët se gjatë këtij viti pjesa më e madhe e investimeve të Bashkisë së Tiranës do të fokusohen në zonën e Kasharit, e cila deri dje konsiderohej një zonë e paurbanizuar dhe e lënë në harresë.
Brenda dy viteve në Tiranë janë mbjellë mbi 50 mijë pemë, 3 mijë prej të cilave në Farkë. /tesheshi.com/
