Kryebashkiaku i Tiranës, Erion Veliaj kërkoi bashkëpunimin e qytetarëve për aksionin e pastrimit të Tiranës, puna për të cilin, si tha, ka nisur, por vetëm sa ka gërvishtur malin e problemeve të grumbulluara. Në një takim me shoqërinë civile, Veliaj kërkoi më shumë angazhim për ruajtjen e mjedisit, ndërsa më herët në një letër publike drejtuar familjeve të Tiranës shkruan se kërkohet edhe kontributi i tyre në aksionin e pastrimit që nis më 4 Shtator.
“Angazhimi juaj në këtë ditë, duke ndihmuar për pastrimin e rrugës apo lagjes tuaj, është garancia më e mirë për një qytet të pastër e të jetueshëm për të gjithë. Duhet veç një palë doreza, një qese e shumë dashuri për Tiranën tone”, shkruan Veliaj.
Ndër masat që kreu i bashkisë së Tiranës premton janë “kufizimi i lirisë së atyre njerëzve që uzurpojnë” dhe vendosja e gjobave për të ruajtur ambjentin.
Lidhur me transportin urban, Veliaj ka premtuar vendosjen së shpejti të abonesë elektronike. /tesheshi.com/
