Blloku i banimit në zonën e Selitës në Tiranë po i nënshtrohet rehabilitimit të plotë, ndërsa punimet janë inspektuar nga Kryebashkiaku Erjon Veliaj. Kjo ndërhyrje në këtë zonë është e para në 30 vitet e fundit. Në këtë zonë që i përket njësisë administrative Nr. 5 në kryeqytet po punohet për rikonstruksionin e plotë të rrjetit rrugor, ndërtimin e kanalizimeve të ujërave të zeza, ndriçimit rrugor si dhe të gjelbërimit.
Kryetari i Bashkisë së Tiranës u kërkoi qytetarëve që të tregohen bashkëpunues për të liruar hapësirat, të cilat pengojnë realizimin e projekteve në të mirë të gjithë komunitetit.
“Kjo është një lagje kufitare midis njësisë 5 dhe 6, kryesisht me ndërtime informale. 90% e qytetarëve janë bashkëpunues, edhe ai 10% që nuk është bashkëpunues, duhet të kuptojë që përpara se të na vijë civilizimi në tokë, duhet të na vijë civilizimi në kokë dhe nëse nuk bashkëpunojmë me Bashkinë, që edhe në 40 gradë është duke punuar me të njëjtin ritëm si në çdo ditë të vitit, atëherë do të jetë shumë e vështirë që të kemi Tiranën ëndrrave tona”, tha ai.
Sipas tij, ndërhyrje të tilla kërkojnë sakrifica nga të gjithë, në mënyrë që punimet të realizohen sa më cilësore dhe në kohë.
“Të gjithë do bëjmë një sakrificë. Ne do të bëjmë sakrificën e orëve të gjata, me temperatura të larta, ata do të duhet të bëjnë sakrificën e vetëm një metri hapësirë të avllive të tyre, që kur të bëhet puna, të bëhet njëherë e mirë e të mos i rikthehemi vit pas viti për çdo trotuar”, u shpreh Veliaj.
Duke u ndalur në çështjen e zjarreve në Tiranë, kryebashkiaku siguroi se të gjithë institucionet janë në krye të detyrës për përballimin e situatës. Ai u bëri thirrje banorëve që jetojnë në zonat përreth Tiranës që të sinjalizojnë sa më parë çdo rast, pasi kështu mund të shmangen dëme të parikuperueshme në pyje dhe pronën e banorëve.
“Të gjithë kolegët e Bashkisë janë në krye të detyrës, sidomos ata që po merren me situatën e vështirë të zjarreve në zonat periferike, kryesisht ajo e Krrabës, Ibës, Dajtit, zona e Kasharit. Fatmirësisht në shumicën e rasteve, edhe falë kontributit të qytetarëve që kanë lajmëruar në kohë, i kemi shuar zjarret brenda pak orëve. Megjithatë, kërkohet që të jemi të gjithë të vëmendshëm, të lajmërojmë në kohë. Sa më vigjilentë të jemi, sa më shpejt të njoftohemi, aq më nën kontroll mund të mbajmë situatën e zjarreve”, tha ai.
Gjithashtu Veliaj kërkoi mirëkuptimin e qytetarëve sa i përket situatës së furnizimit me ujë të pijshëm në një kohë që vendi ynë po përballet me temperatura të larta dhe me një thatësirë të zgjatur.
“Teksa presim shirat dhe që moti të na shpërblejë me prurje nëpër rezervuarë e burime, është shumë e rëndësishme të vazhdojmë të kursejmë ujin e pijshëm. Çdo ujë që derdhet kot është duke lënë pa ujë dikë tjetër. Vazhdojmë të kemi nën kontroll mbi 90% të territorit të Tiranës dhe për të gjithë problematikën që kemi vetëm tek zona e Unazës së Re, ish zona e komunës Kashar, po vazhdojmë me tre turne botet. Në momentin e parë që njoftohemi në 0800 44 88, që është numri i Ujësjellësit, menjëherë bëjmë furnizime shtesë”, tha Veliaj. /tesheshi.com/
