Besimtarët muslimanë që do rendin të dielën drejt qendrës së Tiranës për të falur namazin e Fiter Bajramit, pikërisht në sheshin e ri “Skënderbej”, do e kenë parkimin e garantuar dhe për mbi të gjitha falas. Kjo u bë me dije nga kryebashkiaku Veliaj, i cili sqaroi se do ketë një angazhim maksimal për t’i ofruar masës së besimtarëve optimalitetin e nevojshëm për ritualin e tyre.
“Ne kemi marrë të gjitha masat për të gjitha nevojat logjistike, duke filluar që nga fonia, pastrimi, shatërvanet. Do të ofrojmë parkingjet e bashkisë falas për besimtarët nga ora 5-7 e mëngjesit e nëse parkingu tek sheshi është i zënë do hapet parkingu i Bulevardit të Ri. Pra, do ketë vende. Por i bëj thirrje të gjithë besimtarëve që vijnë nga zona e qendrës të mos përdorin makinat, në mënyrë që të lihet vend atyre që vijnë nga periferitë apo rrethet”, tha Veliaj.
Për njeriun që drejton Tiranë, erdhi më së fundi dita që falja e Bajrameve mos kryhet në rrugë. Veliaj shprehu konsiderata për të gjithë ata musliamë të cilët përgjatë Ramazanit shpalosën virtytin e bamirësisë dhe solidaritetit ndaj njerëzve në nevojë.
Deklarimet e Veliajt u bënë gjatë një prononcimi të tij me Myftiun e Tiranës, Ylli Gurra, pikërisht në kuadër të përgatitjeve për Fiter Bajramin. /tesheshi.com/
