Kryetari i ri i bashkisë së Tiranës, Erion Veliaj i shpalli luftë zhulit në kryeqytet në një fjalim që mbajti përpara punonjësve të pastrimit e operatorëve të tjerë që punojnë për llogari të Bashkisë.
Veliaj mësohet se ka mbledhur në agim punonjësit në sheshin “Nënë Tereza” ku ka lënë afat 4 muaj për një performancë më të lartë në punë dhe rritjen e standardeve në pastrimin e qytetit.
Nga kjo performancë do të bëhet edhe vlerësimi për kontratat e lidhura nga bashkia e mëparshme, nëse ato do të vazhdojnë apo jo. Vlerësimi do të bëhet nga sondazhet që Bashkia do të realizojë në lagjet e kryeqytetit.
“Unë kam ndërmend të dal faqebardhë nga kjo luftë dhe do ta fitoj këtë luftë. Standardi për Tiranën është të jetë qyteti më i pastër në Ballkan jo në Shqipëri. Tirana nuk mund të jetë kryeqytet i zhulit, shqiptarët nuk janë pisanjosë”, tha Veliaj.
Kryetari i Bashkisë u angazhua personalisht të dalë në çdo cep të Tiranës për të monitoruar ecurinë e aksionit kundër papastërtive
“Ta fillojmë betejën që sot, në luftën tradicionale shkonin me tanke me blinda, ne do shkojmë me fshesa, me bote, me makina teknologjike”, tha Veliaj. Në shtator ai njoftoi se do të nisë një aksion qytetar për pastrimin e Tiranës, por nuk dha detaje. /tesheshi.com/
